Shqiptarët e panë qartë një ditë më parë se sa ndryshe mendojnë Uashingtoni dhe Brukseli kur bie fjala tek çështja e zgjedhjeve në Shqipëri.
Por ky dallim është shpërfaqur muaj më parë, me ardhjen e administratës së Donald Trump në pushtet.
Zëvendëspresidenti amerikan, JD Vance mbajti një fjalim të ashpër në Konferencën e Sigurisë në Mynih, ku kritikoi ashpër kontinentin e vjetër për qasjen e tij ndaj lirive dhe të drejtave të njeriut.
Kryetari republikan i Komisionit për Marrëdhëniet me Jashtë në Dhomën e Përfaqësuesve, Brian Mast, së bashku me disa kongresmenë të tjerë të djathtë, thotë se SHBA janë alarmuar për shkak të standardeve të dyfishta që po përdoren nga Brukseli për zgjedhjet presidenciale në Poloni.
“Shprehim shqetësim i thellë për zhvillimet e raportuara në Poloni që mund të dëmtojnë integritetin e proceseve të saj demokratike”, thuhet në letër.
“Sot, Kryetari i Komitetit për Punët e Jashtme të Dhomës së Përfaqësuesve, Brian Mast, së bashku me anëtarë të tjerë të panelit, i dërguan një letër Presidentes së Komisionit Evropian, Ursula von der Leyen, duke shprehur shqetësime serioze mbi rolin e Bashkimit Evropian në sigurimin e zgjedhjeve të ndershme ndërsa Polonia i afrohet raundit të dytë të zgjedhjeve presidenciale më 1 qershor 2025.
Kryetari Mast dhe kolegët e tij republikanë citojnë raportime të fundit se një OJQ polake me lidhje me donatorin e madh të Partisë Demokrate në SHBA, George Soros, ka lehtësuar një fushatë në rrjetet sociale me vlerë 105,000 dollarë, që përfshin reklama politike të dyshuara si të paligjshme, duke promovuar kandidatin e Koalicionit Qytetar, Rafal Trzaskowski, dhe duke diskredituar rivalët e tij.
Këto zhvillime të reja pasojnë një refuzim shumëmujor nga qeveria aktuale e Polonisë për të lëshuar dhjetëra miliona dollarë fonde publike për fushatën e partisë opozitare Ligj dhe Drejtësi (PiS),” thuhet në letër.
Por si është historia e shpjeguar me pak fjalë?
Të dielën votohet për presidentin e ardhshëm të Polonisë. Në garë janë Rafal Trzaskowski i qendrës së majtë dhe Karol Nawrocki i qendrës së djathtë.
Një OJQ e lidhur me Sorosin ka sponsorizuar mijëra dollarë reklama në rrjetet sociale për të diskredituar kandidatin e djathtë. Ligji e ndalon rreptësisht që të përdoren para të huaja për të financuar fushatën. Megjithatë, autoritetet polake nuk bënë asgjë për të ndalur këtë fushatë.
Nga ana tjetër, komisioni zgjedhor ka bllokuar miliona euro që duhet t’i jepeshin kandidatit të djathtë për të bërë fushatën, me pretendimin se të djathtët kanë shkelur rregullat dhe ligjet zgjedhore në të shkuarën.
Gjykata Supreme e Polonisë ka marrë vendim për të çliruar këto fonde, por qeveria e majtë atje nuk pranon të zbatojë vendimin me pretendimin se nuk e njohin këtë gjykatë.
Discussion about this post