Një tjetër reagim diplomatik ka ardhur lidhur me kaosin e krijuar në Kuvendin e Shqipërisë, veçanërisht në seancën e fundit parlamentare, ku pothuajse me një situatë të jashtëzakonshme, socialistët e drejtuar nga Edi Rama miratuan në parim projektbuxhetin e vitit 2024.
Në një sallë të mbushur me gardistë që kishin rrethuar foltoren e Kuvendit, por edhe pjesën e vendeve të deputetëve të opozitës, duke u kthyer në barrikada njerëzore mes tyre dhe kolegëve të mazhorancës, dhe tymueset që u aktivizuan nga ligjvënës opozitar, Lindita Nikolla, Kryeparlamentare, vendosi të hedhë në votim në parim projekt-buxhetin dhe të mbyllë seancën plenare në më pak se 5 minuta.
Kjo situatë fillimisht solli reagimin e Ambasadës britanike, më pas asaj të SHBA dhe së fundmi u pasua nga një reagim i Ambasadorit të Gjermanisë në Tiranë. Në të tre reagimet diplomatike, i kërkohet palëve, pozitës dhe opozitës, që të rikthejnë normalitetin dhe që Kuvendi i Shqipërisë të ushtrojë kontrollin e ekzekutivit.
“Po ndjek me shqetësim zhvillimet e fundit në Kuvendin e Shqipërisë. Qytetarët/et e Shqipërisë presin me të drejtë nga parlamenti i tyre që të jetë një forum, ku anëtarët e të cilit të mund të prezantojnë dhe diskutojnë hapur propozime të ndryshme politike. Ky shkëmbim duhet të zhvillohet në paqe dhe të drejtohet nga rregullat, që i ka përcaktuar vetë parlamenti.
Ndaj u bëj thirrje anëtarëve të shumicës dhe opozitës në Kuvend që të bashkëpunojnë, me qëllim që të garantojnë, që parlamenti të plotësojë rolin e tij thelbësor kushtetues: kontrollin e ekzekutivit dhe ligjvënien në interes të qytetarëve/eve të përfaqësuar përmes deputetëve”, thuhet në reagimin e ambasadorit gjerman, Bergner.
Tensionet mes pozitës dhe opozitës në Kuvend nisën rreth 1 muaj më parë, kur nga ana e socialistëve u refuzuan kërkesat për ngritje të Komisioneve Hetimore, por edhe zëvendësimin e anëtarëve të opozitës në Komisionin për Reformën Zgjedhore. Opozita nisi aksionin e saj duke bllokuar seancat plenare dhe komisionet parlamentare, ndërsa socialistët tentuan të përdorin gardën dhe mbledhjen online për të sfumuar protestat e deputetëve.
Duket se në seancën e djeshme plenare, skenari i socialistëve me trupa të shtuara brenda sallës së Kuvendit të gardistëve dështoi për të ndalur protestën e opozitës, ndërsa Kryeministri Edi Rama paralajmëroi një copëzim përfundimtar të opozitës, duke akuzuar ish-Kryeministrin Sali Berisha, të cilin e konsideroi një të kërkuar nga drejtësia, për mbjelljen e kaosit dhe tensioneve.
Discussion about this post