Rreth 500 kilogramë kokainë është kapur sot nga Policia e Dubait.Mësohet se droga e sekuestruar do të kapte vlerën prej 136 milionë dollarësh.
Autoritetet arrestuan një person me origjinë nga Lindja e Mesme, i cili vepronte si ndërmjetës për një grup ndërkombëtar të drogës.
“Policia e Dubait ka penguar kohët e fundit një përpjekje kontrabande prej 500 kilogramësh kokainë të pastër në vend për qëllim të shitjes dhe promovimit”, ka shkruar policia në Facebook.
“Lënda narkotike ishte e fshehur mirë brenda strukturës së një kontejneri ngarkesash”, thuhet mes tjerash në deklaratën e tyre.
Pritet që të zbardhen detaje të reja pas marrjes në pyetje të të arrestuarit për itinerarin, trafikantët dhe sigurimin e kokainës.
