Kapitenia e Kombëtares së femrave Megi Daci ka reaguar lidhur me zhvillimet e fundit, ku kryebashkiaku nisi një fushatë sulmesh dhe kërcënimesh ndaj anëtarëve të futbollit shqiptar. Në një postim në rrjetin social Instagram ajo shpreh solidaritet për tritolin që u vendos në shtëpinë e Presidentit të FSHF-së Armand Duka.
“Një shpërthim tritoli në shtëpinë e Presidentit të FSHF-së, Armand Duka ka tronditur të gjithë botën e futbollit shqiptar dhe atë ndërkombëtar. I shpreh Presidentit Duka dhe familjes së tij, solidaritetin tim të plotë në lidhje këtë ngjarje të rëndë dhe të shëmtuar”, ka shkruar ajo.
Ndër të tjera Daci shpreh revoltë për ndërhyrjen e politikës në futboll, duke dalë krah Dukës, pasi sipas saj ai e ka mbështetur futbollin e femrave.
“Gjithashtu, meqë shoh se ditët e fundit politika po “fut” duart shumë në futboll, dua të falënderoj publikisht Presidentin e FSHF-së për mbështetjen e madhe që po i jep futbollit të femrave, futbollit tonë të bukur, që po zhvillohet normalisht, ashtu sikurse në çdo shtet tjetër europian. Sot, çdo vajzë mund të luajë futboll! Kjo është kënaqësia jonë më e madhe, jo politika!”, ka përfunduar ajo.
Sulmi i kryebashkiakut Erion Veliaj ndaj kreut të FSHF-së Armand Duka, vijon të jetë kryefjalë e medieve. Ndërhyrja e politikës në futboll me gjuhë aspak etike por edhe me kërcënime ndaj anëtarëve të saj, ka sjellë një sërë reagimesh edhe nga bashkitë e tjera të vendit të cilat e kundërshtojnë këtë veprim të paprecedentë.
Discussion about this post