Presidenti Ilir Meta përmes një statusi në rrjetin social “Facebook”, ka reaguar lidhur me sasinë e konsiderueshme të lëndës narkotike, e cila u kap në një pyll nga policia turke. Droga mësohet se vinte nga Shqipëria në rrugë detare. Lidhur me këtë ngjarje Meta u shpreh se sasia 1.5 tonë drogë është një ndër më të mëdhajat e trafikuara drejt Turqisë nga Shqipëria. Sipas Metës ky është një tregues se prodhimi i hashashit nga grupet kriminale në vend vijon me ritme të larta.
“Me mjaft shqetësim kam përcjellë kapjen pranë Izmirit të një sasie rekord droge të nisur në rrugë detare nga Shqipëria. 1,5 ton drogë përbën një nga sasitë më të mëdhaja të trafikuar nga Shqipëria në Turqi në rrugë detare, çka tregon se prodhimi i hashashit, në këtë rast i llojit më të fundit skunk, dhe trafikimi i tij nga grupet e krimit të organizuar, vijon me ritme të larta në vend.”
Përmes këtij postimi presidenti Ilir Meta ka bërë apel ndaj qeverisë dhe sistemit të drejtësisë në Shqipëri për të përforcuar kapacitetet profesionale dhe të tregohet vullneti i duhur politik për parandalimin e këtyre situatave. Sipas tij të tilla raste përbëjnë një rekord të zi për vendin, ndaj kërkon që personat pas këtij trafiku masiv të drogës drejt Turqisë të vihen para drejtësisë.
“I bëj thirrje Qeverisë, institucioneve ligjzbatuese dhe të sigurisë në vend, që të tregojnë vullnetin e duhur politik, si dhe të forcojnë kapacitetet profesionale dhe bashkëveprimin në terren, për të parandaluar raste të tilla, që përbëjnë rekorde të zeza për vendin. Gjithashtu, apeloj për hetimin e plotë dhe të thellë të këtij trafiku kriminal dhe sjelljen përpara drejtësisë të të gjithë atyre që qëndrojnë pas tij. Po kështu, i bëj thirrje Kuvendit të rrisë rolin e tij në mbikëqyrjen e luftës kundër trafikut të drogave dhe krimit të organizuar.”, shkruan Meta.
Tre ditë më parë policia turke përmes informacioneve që kishte siguruar se një sasi e konsiderueshme lëndësh narkotike do të mbërrinte nga Shqipëria, bëri të mundur sekuestrimin e 1.5 tonë drogë dhe arrestimin e tre personave të armatosur në një pyll në zonën e Muglas.
Discussion about this post