KAS ka vijuar sot me shqyrtimin e ankesave të PD dhe LSI për zgjedhjet e 25 prillit në qarkun e Vlorës.
PD dhe LSI kanë paraqitur pretendimet e tyre, teksa përfaqësuesi i demokratëve, Marash Logu ka akuzuar me emra se Damian Gjiknuri, Alket Hyseni, Afrim Qendro, Vilma Bello dhe drejtorët Klodian Troci e Erion Osmanaj janë përfshirë në shitblerjen e votave ose ndikimin tek votuesit me qëllim deformimin e vullnetit të tyre për 25 prillit.
Nga ana tjetër përfaqësuesi i PS, Eridian Salianji i kërkoi opozitës mos vijonte më me kërkesat e tjera ankimore pasi nuk po sillte asnjë gjë të re teksa i kërkoi KAS të refuzojë shqyrtimin e ankesave për Vlorën.
Eridian Salianji (PS): Do thoja që në aspektin primar, ankimi nuk qëndron, s’duhet shqyrtuar. Kodi Zgjedhor në pjesën për pavlefshmërinë e përcakton si ngrihet kërkesa për pavlefshmëri. Kërkohet KQZ, i shpall zgjedhjet të pavlefshme me një ose disa QV. Në asnjë prej kërkesave nuk dëgjuam shkeljet në një apo disa QV në Vlorë. Nga ky moment nuk duhet ta shqyrtoni ankimin.
E tepërt të dëgjoj të njëjtën kërkesë. Dy ndryshime vura re, Vlora për Pallatin e Kulturës, e ndryshme nga Gjirokastra e Vlorë dhe e dyta falënderimi për patronazhistët. Do të thoja që i kemi dëgjuar dhe opozitën do e dëgjojmë për respekt, por efektin publik e politik këto kërkesa i kanë dhënë. Duhet të ecim shpejt, të rrëzohet kërkesa dhe të shpallet vendimi përfundimtar.
Opozita të tërhiqet nga kërkesat ankimore, s’po thotë asgjë të re. Po e përdor këtë tavolinë për debat publik. Tërhiqni kërkesat ankimore dhe të shpallim rezultatin publik.
