Elhan Kastrati është një prej futbollistëve shqiptarë që po paraqitet mjaft mirë në Serinë B me Çitadelën, ku është titullar i padiskutueshëm. Aventura me këtë skuadër i ka dhënë mundësinë për tu përballur me legjendën e futbollit italian Xhanluixhi Bufon. Javën e kaluar Çitadela u mposht nga Parma në kampionat, por Kastrati ka pranuar se për të do të mbetet një kujtim i bukur pasi arriti të takohej me gardianin italian.
“Isha pranë gjyqtarëve për zgjedhjen e fushës dhe erdhi ai të më takonte i pari. Më emocionoi fakti që luajta kundër atij që e është një mit, e shihja gjithmonë në TV, imagjinojeni se çfarë kam ndjerë kur isha në të njëjtën fushë me të.
Mendojeni pak që në fund të ndeshjes, po tundohesha nga ideja për t’i kërkuar fanellën, por pastaj ne ishim mundur dhe ai kishte hyrë në dhomat e zhveshjeve, ndaj nuk e bëra një gjë të tillë. Por në një moment, erdhi magazinieri i Parmës në dhomat tona të zhveshjes dhe më pyeti nëse dëshiroja të shkëmbeja fanellën me atë të Xhixhit. Kështu shkova t’ia jepja vetë dhe biseduam pak. Ishte diçka e bukur, një nga ato momente të cilat do t’i kujtoj gjithmonë”, tregoi Kastrati.
Discussion about this post