Qytetarët e Vlorës kanë dalë këtë mëngjes në një protestë paqësore, për të kundërshtuar ardhjen e anijes së parë në portin e Vlorës për prodhimin e energjisë elektrike. Qytetarët thonë emetimet nga anija, e cila do të djegë rreth 600 ton naftë në ditë janë tejet të rrezikshme për bregdetin e Vlorës.
Dy platformat e anijes gjigante do të ndotin detin nga emetimet e tyre të rrezikshme, që do të lënë pasoja deri në 30 vitet e ardhshme. Sakaq protestuesit thonë se kjo nuk është vetëm katastrofë mjedisore, por edhe ekonomike, pasi një bregdet i ndotur largon turistët nga vendit.
Protestuesit thonë se nafta në Vlorë, jo vetëm që nuk e zgjidh krizën energjetike, por përkeqëson gjendjen mjedisore dhe social-ekonomike në Vlorë.
“Jemi të angazhuar për të reaguar për diçka që po ndodh sot, por që mund të ketë pasoja të rrezikshme për të gjithë gjirin e Vlorës në 30 vitet e ardhshme. Protesta do të vazhdojë në ditët në vijim. Çështja është shumë serioze. Kjo anije ka të inkorporuara dy platforma që do të instalohen te triporti, portit të peshkatarëve. Dy platforma super gjigande që do të djegin 600 ton naftë të rëndë në ditë. Kjo është katastrofë. Kjo sasi nafte që do të digjet është sikur 100 mijë makina të bëjnë xhiro 100 kilometra brenda ditës. Jo vetëm katastrofë mjedisore por edhe ekonomike, sidomos për turizmin. Nuk mund të bashkëjetojë një turizëm me një industri nafte, me super emetimet. Është një gjenerator përbindësh”, thotë një njëri nga protestuesit.
Një nga dy anijet të cilat janë marrë me qira nga qeveria për prodhimin e energjisë elektrike, mbërriti sot në Portin e Vlorës. Dy anijet e marra me qira, pritet që të përmbushin 15% të kërkesës së vendit për energji.
Discussion about this post