Ditën e sotme veç ndeshjes mes Skënderbeut dhe Kastriotit në Superligë, luhen edhe ndeshjet e Kategorisë së Parë, të vlefshme për javën e 14-të.
Të gjitha ndeshjet luhen në orën 13:30, ndërsa mes sfidave spikat “derbi” Apolonia-Lushnja. Fierakët ndodhen në vendin e 10-të të Kategorisë së Parë me 16 pikë, ndërsa tre vende më poshtë pozicionohet Lushnja me 5 pikë më pak, duke rrezikuar mbijetesën në këtë kategori.
Ndeshja tjetër do të jetë ajo mes Tomorit dhe Turbinës së vendit të fundit. Skuadra nga Cërriku mbyll renditjen me 9 pikë, ndërsa Tomori është në vendin e 5-të me 19 pikë.
Erzeni përballet me Vorën në shtëpi për të mos u shkëputur nga Bylisi, që është tre pikë para aktualisht. Ndërkohë Vora, renditet e 14-ta me 10 pikë. Tërbuni do të presë Pogradecin e vendit të 12-të.
Ndërkohë, ditën e nesërme Korabi do të përballet me Maliqin e vendit të parafundit, në mënyrë që të ruajë vendin e tretë dhe një mundësi për në Superligë. Po nesër, Besa përballet me Beslidhjen. Aktualisht kavajasit pozicionohen të gjashtët me 18 pikë, ndërsa lezhianët janë në vendin e 9-të me 16 pikë. Ditën e nesërme luhet edhe sfida mes Bylisit dhe Butrintit.
Discussion about this post