Deputeti i PD-së, Belind Këlliçi, ka denoncuar qeverinë, duke akuzuar për përfshirjen e administratës shtetërore në fushatën elektorale.
Në një reagim në rrjete sociale, Këlliçi ka denoncuar se dy drejtoresha të Ministrisë së Arsimit, Mirela Cami dhe Matilda Shabani, po marrin pjesë aktivisht në fushatën e ish-shefes së tyre, Ogerta Manastirliut, duke lënë pas dore detyrat ligjore dhe institucionale që u janë ngarkuar.
Sipas tij, ky është një akt i qartë shkeljeje të Ligjit për Nëpunësin Civil, veçanërisht për drejtues të nivelit të lartë që duhet të jenë politikisht të paanshëm.
“Ndërkohë që do të duhej të punonin për rritjen e cilësisë së arsimit në vend, drejtoreshat janë përfshirë në fushatën e partisë, si patronazhiste të rëndomta. Kjo është një shkelje e pastër e ligjit dhe një tregues se si qeveria e ka kthyer administratën në një shtab elektoral,” – deklaroi Këlliçi.
Ai e cilësoi këtë situatë si pjesë të një politike të dëmshme të “partisë mbi shtetin”, që sipas tij ka sjellë pasoja të rënda për sistemin arsimor shqiptar nga rënia në testet ndërkombëtare PISA, te zbrazja e universiteteve dhe rreziku i mbylljes së fakulteteve shkencore.
Postimi i plotë i Këlliçit:
Fushata për Tiranën: Shkelja e ligjit me të dyja këmbët dhe militantizmi i administratës!
Në fushatën qeveritare për Bashkinë Tiranë vihen re dy Drejtoresha të Përgjithshme tek Ministria e Arsimit, Mirela Cami dhe Matilda Shabani!
Ndërkohë që do duhej të ushtronin detyrat e tyre në shërbim të rritjes së cilësisë së arsimit në vend, drejtoreshat përfshihen në fushatën e ish shefes së tyre Ogerta Manastirliut, si patronazhiste të rëndomta!
Plotësisht në shkelje të Ligjit për Nëpunësin Civil, aq më tepër për drejtuese të nivelit të lartë.
Kjo politikë e mbrapshtë e “partisë mbi Shqipërinë” është arsyeja e qartë e rënies drastike në testin PISA, zbrazjen e klasave të mësimit dhe auditoreve, rrezikun e mbylljes së fakulteteve shkencore dhe performancën e vazhdueshme të ulët të sistemit tonë arsimor.
Personalisht denoncoj me forcë vënien në rresht të administratës për fushatën e Tiranës, nga niveli më i lartë e deri tek ai më i ulët.
Militantizmi, fanatizmi partiak, servilizmi dhe patronazhimi nuk mund të jenë kurrë baza të shëndetshme për një administratë funksionale në shërbim të shtetit dhe shoqërisë.
Ne kërkojmë marrjen e masave urgjente për pezullimin nga detyra dhe madje ndjekjen penale të kujtdo që shkel ligjin ditën për diell.
Historia e keqpërdorimit të administratës publike dhe shndërrimin e saj në një formacion partiak duhet të marrë fund!
Discussion about this post