Deputeti demokrat Belind Këlliçi në një dalje publike, ka zyrtarizuar kandidaturën e tij për të marrë pjesë në primaret brenda PD për të dalë më pas kandidat për kryetar Bashkie të Tiranës kundër kreut aktual Erjon Veliaj.
Këlliçi theksoi se po futet në këtë garë për tu rikthyer qytetarëve qytetin e tyre i cili sipas tij, tashmë është i vjedhur, ndërsa akuzoi Veliajn se shfrytëzoi pushtetin për qëllime personale.
“Kam vendosur të kandidoj në primaret e Partisë Demokratike. Ky vendim u arrit për disa arsye: së pari Tirana ka nevojë dramatike për ndryshim. Besoj se Bashkia është shfrytëzuar nga Veliaj për pasurim të jashtëligjshëm. Veliaj e ka shfrytëzuar detyrën për të blerë mbështetje politike brenda PS-së. Tirana mund të rregullohet edhe pa vjedhur. Ky është një model që politikanët duhet të ndërgjegjësohen. Tirana bëhet çdo ditë e më shumë e pajetueshme. Në 8 vite Tirana humbi trashëgiminë e saj historike qindra vjeçare. Veliaj kërkon të shfrytëzojë këtë pushtet, i duhet bashkia për një mandat të tretë, që këtë model të vjedhjes ta rrisë akoma më shumë. E kam të papranueshme të mbetem një dëshmitar okular i kësaj katastrofe në Tiranë. Të rinjve këtu u duhen tre jetë për të blerë një apartament. Veliaj është i vetmi njeri që mund të ketë konkurruar Ramën për abuzim me detyrën, për instalimin e një modeli të mbrapshtë. Ai dhe modeli i tij duhet larguar një orë e më parë. Kandidoj pasi besoj se për të drejtuar Tiranën duhet të fitosh në fillim besimin e forcës ku kandidon. Unë nuk i bëj kurrë bisht garave dhe përballjes. Nuk kam asgjë për tu turpëruar dhe jam krenar për rrënjët e mia. Nuk kam të vdekur në ndërgjegje. Nuk kam shpikur inceneratorë për të vjedhur”, tha ndër të tjera deputeti.
Më herët, ish-kryeministri Berisha, nga konferenca ku nënshkroi marrëveshjen me Ilir Metën për zgjedhjet vendore, e përgëzoi për vendimin e tij. Por, Berisha theksoi se ka edhe persona të tjerë që kanë shprehur dëshirën për të qenë kandidatë për kreun e Bashkisë së Tiranës, dhe priten të zyrtarizojnë së shpejti kandidaturën.
Discussion about this post