Mjeku i njohur Tritan Kalo thotë se tashmë kemi hyrë në stinën e infeksioneve respiratore, shumica e të cilëve ngjasojnë me Covid, me lutjen që të mos teprohet në përdorimin e antibakterialeve/ antibiotikëve.
“Gradualisht kemi hyrë në stinën e infeksioneve respiratore të shumta dhe të shpeshta, nga kataret e vijave të sipërme të frymëmarjes (faringite, laringite, trakeite) deri në prekjet e vijave të poshtme të frymëmarrjes (bronkite, bronkopneumoni e pneumoni)…..Tonsilat/ bajamet si “vija e parë” e përballjes me shkaktarët e këtyre infeksioneve, acarohen e infektohen edhe ato shumë shpesh”.
Kalo shkruan se shenjat klinike si dhimbje fyti, vështirësi në gëlltitje, dhimbje koke, dhimbje kyçesh e muskujsh, temperaturë, kollë e thatë dhe djersë, janë pothuajse shenja të njëjta si për gripin stinor, ashtu dhe për Covid.
“Në shumicën e tyre këto infeksione janë të natyrës virale dhe shumë më pak të natyrës bakteriale, çfarë nuk e justifikon aspak dhënien vend e pa vend të antibakterialëve/antibiotikëve në këta të sëmurë të çdo moshe qofshin ata….Shenjat klinike si: dhimbje fyti, vështirësi në gëlltitje, dhimbje koke, dhimbje kyçesh e muskujsh, temperaturë, kollë e thatë më shpesh se ajo produktive, këputshmëria trupore, djersë, etj, vërehen në shumicën e tyre, çka shpesh ato konfondohen me infeksionin nga virusi i Sars-Cov2/Covid-19”.
Ai i fton qytetarët, që përveç respektimit të masave të distancës dhe higjenës, të vaksinohen, pasi sipas tij është rruga e vetme për parandalimin e infektimit.
“Masat e kurdokohshme në parandalimin ose uljen e shpeshtësisë së këtyre infeksioneve MHD (Maskë e përdorur në mjedise të mbyllura e të mbipopulluara; Higjenë sa më e mirë personale e të mjediseve publike; Distancim fizik kur dhe kurdo që është e mundshme). Vaksinimi luan edhe ai një rol të rëndësishëm si në përballjen me infeksionin nga Sars-Cov2/Covid-19 po ashtu edhe ndaj gripit stinor, sidomos në grupet e riskut: ekstremet e moshave, në diabetikët, në të sëmurët me sëmundje kronike kardiake, renale, hepatike, shtatzënat, etj”.
Ndër të tjera, Kalo bën thirrje të mos dëgjohen teoritë konspirative lidhur me vaksinimin, ndërsa shton se jeta e çdo shqiptari është e shtrenjtë.
