Ambasada e SHBA në Tiranë ka reaguar pas publikimit të informacioneve se i shumëkërkuari i drejtësisë shqiptare, Laert Haxhiu kishte në shënjestër dy prokurore, njëra prej të cilave në SPAK.
Plani i Laert Haxhiut u mësua pas dëshmisë së të penduarit Marjus Tafani, i cili pohoi për prokurorët e Elbasanit se dy prokuroret dhe një avokat në Lushnje ishin në shënjestrën e grupit të Laert Haxhiut.
Pas dëshmisë së Tafanit, dy prokuroret u vendosën në mbrojtje nga Policia, ndërkohë që në media janë zbardhur detaje të ndryshme lidhur me çështjen.
Ndonëse në deklaratën e Ambasadës së SHBA nuk ka një specifikim për rastin në fjalë, ajo vjen direkt pas zbardhjes së dëshmisë së Tafanit.
Ambasada e SHBA shpreh shqetësimin për këtë situatë dhe thotë se populli shqiptar kërkon një sistem drejtësie që funksionon pa kërcënime. Ambasada e SHBA rithekson mbështetjen e palëkundur për zyrtarët e zbatimit të ligjit në Shqipëri që luftojnë korrupsionin dhe krimin e organizuar.
Mesazhi i plotë i Ambasadës amerikane në Tiranë:
Një sistem drejtësie që funksionon pa frikë dhe kërcënime është kërkesë legjitime e popullit shqiptar dhe Shtetet e Bashkuara janë thellësisht të shqetësuara për kërcënimet për dhunë ndaj zyrtarëve të zbatimit të ligjit që po punojnë për ta bërë Shqipërinë të sigurt, të begatë dhe më demokratike.
Hetuesit, prokurorët dhe gjyqtarët duhet të jenë në gjendje të kryejnë detyrat e tyre pa kërcenime apo kanosje.
Shtetet e Bashkuara ritheksojnë mbështetjen e tyre të palëkundur për zyrtarët e zbatimit të ligjit në Shqipëri, të cilët po luftojnë korrupsionin dhe krimin e organizuar me guxim, si dhe janë gati të mbështesin përpjekjet e tyre.
Discussion about this post