Një shtetas 36-vjeçar është arrestuar në flagrancë në qytetin verilindor të Kukësit teksa nëpërmjet telefonit ka kërcënuar vjehrrën e tij. H. M., u gjet në banesën e tij me një armë zjarri të cilën e kishte pa leje. Policia e ka akuzuar zyrtarisht këtë shtetas për “mbajtje pa leje dhe prodhim të armëve, armëve shpërthyese dhe të municionit” si dhe për “kanosje”.
Njoftimi i policisë:
“Kukës
Kanosi për jetën, përmes telefonit, vjehrrën e tij, arrestohet në flagrancë 36-vjeçari.
36-vjeçarit iu gjet në banesë, një armë zjarri pushkë të cilën e mbante pa leje.
Specialistët për Hetimin e Krimeve të Komisariatit të Policisë Kukës, menjëherë pas kallëzimit të marrë nga një shtetase se po kanosej për jetën, përmes telefonit, kanë organizuar punën me qëllim kryerjen e të gjitha veprimeve procedurale për verifikimin e plotë të këtij kallëzimi.
Për këtë rast, Policia e Kukësit arrestoi në flagrancë shtetasin H. M., 36 vjeç, banues në fshatin Pobreg, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Kanosja”.
Nga hetimet paraprake të kryera, rezultoi se 36-vjeçari kishte kanosur për jetën, përmes telefonit, vjehrrën e tij.
Gjatë kontrollit në banesën e shtetasit H. M., shërbimet e Policisë gjetën dhe sekuestruan në cilësinë e provës materiale, 1 armë zjarri pushkë që mbahej pa leje nga ky shtetas.
Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.”
Discussion about this post