Një grua është kërcënuar nga bashkëshorti i saj me të cilin kishte një konflikt që fatmirësisht është parandaluar që të mos përshkallëzonte.
Shërbimet e Policisë kanë shkuar në vendngjarje dhe kanë vënë në pranga personin P.B., 60 vjeç, i cili pas një konflikti me bashkëshorten kishte tentuar ta godiste me mjet prerës gërshërë dhe e kërcënonte se do ta vriste me armë zjarri.
Ngjarja ka ndodhur në fshatin Vermosh të njësisë administrative Kelmend, në Malësi e Madhe, Shkodër ku personi me inicialet P. B. kishte konflikt me bashkëshorten e tij, zonjën me inicialet F. B., të cilës i rrezikohej jeta nga bashkëshorti, pasi ai e kërcënonte me mjet prerës dhe me armë zjarri.
Gjatë kontrollit në banesë, shërbimet e Policisë gjetën dhe sekuestruan në cilësinë e provës materiale një armë zjarri kallashnikov, dy karikatorë, 140 fishekë luftarak dhe një palë gërshërë.
Materialet i kaluan Prokurorisë së Rrethit Gjyqësor Shkodër, për veprat penale “Kanosja”, ”Dhuna në familje” dhe “Armëmbajtja pa leje”.
