Një kontrast i dukshëm mes një proteste komunitare me mesazhe të forta dhe rezultatit të votimit në zgjedhjet parlamentare është shënuar në fshatin Hotolisht të Librazhdit. Banorët e këtij fshati, të cilët më 20 prill kishin dalë masivisht në protestë kundër zgjerimit të rrugës kombëtare Librazhd–Prrenjas, pjesë e Korridorit VIII, në zgjedhjet e 11 Majit i dhanë një mbështetje dërrmuese Partisë Socialiste, e cila drejton qeverinë dhe projektin e kontestuar.
Protesta e disatë dhe e zhvilluar disa javë para zgjedhjeve ishte shprehje e zemërimit të banorëve, të cilët e konsideronin projektin e rrugës si “një kërcënim serioz për jetesën dhe pronat e tyre”. Sipas tyre, projekti sillte ndarjen e fshatit dhe shkatërrimin e banesave. Të pajisur me pankarta dhe me një arkivol të vendosur në mes të rrugës, simbolizuar si “vdekja e fshatit”, protestuesit shprehën pakënaqësinë për mungesën e transparencës dhe përfshirjes së tyre në procesin e projektimit dhe zbatimit të projektit. Mesazhe të forta si “Jemi gati të përgjigjemi! Ose ne, ose ju!” u shfaqën në pankarta, ndërsa një përfaqësues i tyre theksoi heshtjen e institucioneve dhe domosdoshmërinë e reagimit. Pas, 20 Prillit, banorët zhvilluan edhe disa protesta të tjera, megjithatë kërkesat e tyre nuk morën përgjije.
Pas katër protestave, banorët e Hotolishtit iu drejtuan kutive të votimit. Sipas rezultatit përfundimtar nga 10 qendrat e votimit në këtë fshat, Partia Socialiste mori 1445 vota, ose 61.54% të totalit. Koalicioni Partia Demokratike – Aleanca për Shqipërinë Madhështore, forca kryesore opozitare, mori 684 vota, ose 29.13%. Votat e mbetura u shpërndanë mes subjekteve të tjera politike.
Ky rezultat përfundimtar në Hotolisht paraqet një situatë paradoksale, ku komuniteti që protestoi me simbole dramatike kundër një projekti qeveritar, ndërsa në fund i dha një mbështetje të fortë elektorale pikërisht partisë që drejton qeverinë dhe zbaton projektin në fjalë.
Discussion about this post