Një ditë pas SPAK kërkoi arrestimin e deputetit socialist Alqi Bllako si i përfshirë në aferën e inceneratorëve, kryeministri Edi Rama do të mbledhë ditën e sotme Kryesinë e Partisë Socialiste. Mbledhja pritet të zhvillohet në orën 17:00 në selinë rozë, ndërsa ditën e djeshme kreu i qeverisë zhvilloi një mbledhje urgjente me ministrat tek Vila 31 në zonën e ish-Bllokut.
Mbledhja e Kryesisë së PS-së vjen një ditë pasi Prokuroria e Posaçme Kundër Korrupsionit të Krimit të Organizuar (SPAK) ka depozituar në Kuvend kërkesën për arrestimin e deputetit të Partisë Socialiste Alqi Bllako.
Ky i fundit, pasi Prokuroria e Posaçme kundër Korrupsionit dhe Krimit të Organizuar lëshoi urdhër-arrestin ndaj tij bëri me dije se ka lëshuar mandatin e tij si deputet i Partisë Socialiste, duke shtuar se nuk ka nevojë që Kuvendi i Shqipërisë të mblidhet për t’i hequr mandatin dhe se do të gjykohet si një qytetar i thjeshtë.
Kujtojmë se ditën e djeshme SPAK zhvilloi një operacion ku lëshoi disa masa sigurie, një ndër të cilat përfshinte dhe deputetin socialist ku kërkohej masa arrest me burg. Sipas SPAK, Bllako dhe ish-ministri Lefter Koka kanë shfrytëzuar postin për favorizimin e kompanisë koncencionare për inceneratorin e Fierit, në këmbim të shumave të mëdha monetare.
Discussion about this post