Pas 48 orësh kërkimesh, gjendet trupi i pajetë i Armando Zajsi në liqenin e Ulzës

Pas dy ditësh kërkimesh intensive, është gjetur trupi i pajetë i 37-vjeçarit Armando Zajsi, i cili ishte mbytur në ujërat e liqenit të Ulzës pasditen e së hënës.

Sipas informacioneve, trupi i viktimës u nxor nga ujërat e liqenit dhe më pas u transportua për ekspertizë mjekoligjore në Institutin e Mjekësisë Ligjore. Pas përfundimit të procedurave, ai do t’i dorëzohet familjarëve për ceremoninë e lamtumirës.

37-vjeçari kishte shkuar në zonën e Ulzës së bashku me kushërinj dhe miq për të darkuar në një prej restoranteve lokale. Sipas planit, ai pritej të rikthehej në Itali, ku jetonte dhe punonte prej disa vitesh.

Ngjarja dyshohet të ketë ndodhur teksa i riu ka marrë një mjet ujor tip jet ski dhe ka hyrë në liqen për disa xhiro. Në një moment ai është rrëzuar dhe ka tentuar të kthehet me not drejt bregut, por dyshohet se ka humbur ndjenjat dhe është zhytur në ujë.

Në operacionin e kërkimit dhe nxjerrjes së trupit morën pjesë forcat e RENEA-s, shërbimet e Komisariatit të Policisë Mat, Forcat e Armatosura, Shërbimi i Mbrojtjes nga Zjarri dhe Shpëtimi, si dhe forca vullnetare dhe familjarë.

Policia bën me dije se materialet procedurale i janë referuar Prokurorisë për veprime të mëtejshme.

Mat

Në vijim të informacionit paraprak që ka të bëjë me ngjarjen e datës 15.06.2026, të ndodhur në Liqenin e Ulzës, ku shtetasi A. Z., 37 vjeç, banues në Laç, dyshohet se u mbyt pasi humbi kontrollin mbi drejtimin e mjetit lundrues dhe ra në ujë, ju informojmë se:

Pas dy ditësh kërkime intensive, rreth orës 20:00 të ditës së sotme, shërbimet e njësisë së polumbarëve të RENEA-s, në bashkëpunim me shërbimet e Komisariatit të Policisë Mat, Forcat e Armatosura, Shërbimin e Mbrojtjes nga Zjarri dhe Shpëtimi, forca vullnetare dhe familjarë, bënë të mundur gjetjen, nxjerrjen nga liqeni dhe identifikimin e trupit të pajetë të shtetasit A. Z.

Trupi i pajetë do të transportohet në Institutin e Mjekësisë Ligjore, për kryerjen e veprimeve dhe ekspertizës mjekoligjore.

Materialet procedurale iu referuan Prokurorisë, për veprime të mëtejshme.

gijotina.com/