Prokuroria e Posaçme Antikorrupsion i është përgjigjur presidentit Ilir Meta në lidhje me kërkesën e tij për verifikimin e ministrave të qeverisë “Rama 3”.
Në përgjigjen e saj, SPAK thotë se asnjë prej emrave të paraqitura nga presidenti nuk është i regjistruar si person nën hetim në regjistrin e njoftimit të veprave penale të Prokurorisë së Posaçme.
Meta, i dërgoi gjithashtu kërkesën Prokurorisë së Përgjithshme para disa ditësh, pasi kërkonte informacione për 16 emrat e propozuar nga kryeministri Edi Rama si ministra. Ditën e djeshme, Prokuroria e Përgjithshme tha se asnjë nga ministrat nuk ka rezultuar i proceduar penalisht.
Presidenti Meta me anë të një shkrese zyrtare kërkoi që Prokuroria e Përgjithshme dhe SPAK t’i vinte në dispozicion çdo të dhënë në lidhje me proceset hetimore apo penalë që mund të ishin nisur për ministrat e propozuar. Meta kërkonte që përgjigja nga PP-ja dhe SPAK të kthehej sa më shpejt në mënyrë që të mund të shprehej për emërimet brenda shtatë ditëve, siç edhe e kërkon procedura.
