Dy javë më parë redaksi e Gijotina.com ka denoncuar tenderin e zhvilluar në shkelje nga Bashkia Kavajë, për t’i dhuruar 5 miliardë lekë biznesmenit Arbër Abazi. Ky i fundit është nipi i ish-deputetit yë PS-së, Sadri Abazi. Me pak fjalë, tenderi ishte hartuar për të favorizuar miqtë e kryeministrit Rama. Këto shkelje sot kanë shkruar edhe në dorën e Komisionit të Prokurimeve Publike, pasi një nga kompanitë e interesuara ka bërë denoncim.
Bëhet fjalë për prokurimin “Shërbimi i pastrimit të qytetit Kavajë dhe Njësive Administrative Synej, Luz i Vogël e Helmas”, për të cilin janë vënë 5 miliardë lekë . Gijotina.com ka publikuar dokumentet më herët që tregojnë se tenderi është dhënë pa garë, pasi dy ofertat e tjera janë skualifikuar me argumente burokratike, edhe pse ishin më ekonomike. Ndërkaq, në klasifikimin e Open Data tenderi vazhdon të mbajë “flamurin e kuq” për shkak të mungesës së konkurrencës. Por tashmë është një nga operatorët që nxjerr zbuluar të palarat e tenderit të për pastrimin e Kavajës.
Denoncimi
Në ankesën e operatorit Korsel shpk & Cogren shpk theksohet se kriteret cenojnë konkurrencën e lirë dhe janë diskriminuese për faktin që Autoriteti Kontraktor kërkon CV, certifikata specializimi, librezë pune dhe diplomë të një mjeku të përgjithshëm. Kur në të vërtetë ka teknik që mund ta kryejnë kontrollin. Sidoqoftë nuk është nevoja për dorëzimin e kaq shumë dokumenteve për këtë punonjës që do të kontrollojë cilësinë e dezinfektantëve dhe solucioneve të pastrimit.
Gjithashtu, sipas bashkimit të shoqërive Korsel shpk & Cogren shpk kriteri që iu kërkon firmave të paraqesin dokumentin për 46 punonjës që do të merren me këtë projekt është diskriminues dhe kufizon hapësirat për konkurruesit. Ankimuesi shprehet se numri i punonjësve nuk mund të jetë i përcaktuar me shifër konkrete pasi mund të lind nevoja për më shumë apo edhe më pak punonjës gjatë zhvillimit të projektit.
KPP ka publikuar deri më tani kërkesat e ankimuesit si dhe pikat që do të shqyrtohen. Duke vënë në dijeni se ankesa është marrë në konsideratë dhe për pak ditë do të dilet me një vendim. Gjithsesi, cilido qoftë vendimi i KPP në lidhje me denoncimin e ngritur, nuk e zhbën faktin që tenderi është mbyllur pa garë dhe në shkelje të ligjit për prokurimet.
Kjo është një pikë tjetër për të cilën KPP duhet të marrë masa, pasi janë 5 miliardë lekë nga paratë e taksapaguesve në bashkinë Kavajë që po shkojnë në xhepat e një të përkëdheluri si Arbër Abazi. Ky i fundit ka fituar çdo tender që ka garuar në vitet e fundit, pasi xhaxhi i tij Sadi Abazi i ka mirë telat me Ramën.
Sipas të dhënave të mbledhura nga Gijotina.com rezulton se biznesmeni Arbër Abazi ka xhiruar 13 milionë dollarë brenda një viti. Nga viti 2021 deri në fillim të këtij viti, kjo kompani rezulton të ketë përfituar 47 kontrata publike me vlerë 1.2 miliardë lekë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post