Kërpaçi: Transporti publik në Tiranë, një dështim i Veliajt

Partia e Lirisë e cilëson si një dështim situatën me transportin publik në Tiranë.

Nënkryetarja e kësaj partie, Floida Kërpaçi teksa publikon pamjet nga stacionet e urbanëve në kryeqytet thotë se Transporti publik është një nga shqetësimet kryesore të banorëve të Tiranës, por tha ajo, Erion Veliaj nuk ka patur kujdesin në 8 vite që ta përmirësojë atë.

Deklarata:

Transporti publik në Tiranë, një dështim i dukshëm i kryebashkiakut Veliaj.

Transporti publik është një nga shqetësimet kryesore të banorëve të Tiranës, por Erion Veliaj nuk ka patur kujdesin në 8 vite që ta përmirësojë atë.

Në 8 vite kohë, ku në 4 vitet e fundit i gjithë këshilli bashkiak është monopartiak, përmirësim real të transportit publik nuk ka patur, por ai mbetet një premtim i pambajtur i Erion Veliajt!

Kaosi dhe vështirësitë që përballen zonjat, vajzat, të rinjtë, të moshuarit, që përdorin transportin publik në Tiranë si mjetin kryesor të lëvizjes, janë një stres i çdo dite.

Në 2023, tashmë si kandidat për kryetar bashkie, Erion Veliaj përsëriti sërish ditën e djeshme premtimin e përmirësimit të transportit publik; këtë herë duke premtuar se do të vendosen “autobuzë urbanë të shpejtë”.

Jo vetëm që ky është një premtim i pambajtur i tij, por edhe u rrit kosto e biletës dhe abonesë së urbanit, me argumentin se kjo do të çonte në rritjen e cilësisë, shpeshtësinë e urbanëve të cilët do të vinin në kohë dhe nuk do të shtypeshin njerëzit. Realiteti i sotëm flet për rezultate krejt të kundërta nga ato që janë premtuar.

Banorët e Tiranës janë gjykuesit më të mirë për punën e Bashkisë Tiranë dhe premtimet boshe të kryetarit Veliaj, ndaj në 14 Maj do të ndëshkojnë dhe japin votën për ndryshimin!