Këshilli i Mandateve miratoi me 6 vota pro kërkesën e SPAK për lejimin e arrestimit të ish-kryeministrit Sali Berisha. Pro kërkesës së SPAK votuan 5 deputetë të PS dhe Enkelejd Alibeaj nga grupimi Basha.
SPAK kërkoi dhënien e autorizimit për masë më të ashpër ndaj ish-Kryeministrit Berisha, atë të “arrestit shtëëiak” ose “arrest me burg” ndërsa më herët është caktuar masa ‘detyrim paraqitje’, të cilën Berisha nuk e zbatoi me pretendimin se Prokuroria e Posaçme kishte shkelur Kushtetutën duke mos kërkuar më parë autorizimin e Parlamentit.
Ish kryeministri është nën hetim për procedurat e privatizimit të ish Klubit sportiv Partizani, pëmes të cilave dyshohet se ka favorizuar dhëndrin e tij Jamarbër Malltezi, një nga pronarët e truallit ku shtrihej ish klubi e mbi të cilin më pas u ngrit një kompleks pallatesh.
Berisha nuk u paraqit në mbledhjen e Këshillit të Mandateve, por prezent ishin dy avokatët e tij, Sokol Mëngjesi dhe Genc Gjokutaj.
Ndërkohë, PD e drejtuar nga Sali Berisha ka reaguar përmes Sekretares për Marrëdhëniet me Publikun, Jola Hysaj. Kjo e fundit e ka krahasuar mbledhjen e ditës së sotme me ato të kohës së regjimit komunist, duke shtuar se Shqipëria është në një nga momentet më kritike të 33 viteve politikëbërje.
“Këshilli i Mandateve apo Komisioni i Etikës u mblodh sot?
Si në kohën e xhaxhit kur bëheshin mbledhjet e këshillit të lagjes për fletë- rrufenë e rrallës…
U quajtëm kulakë, kush është emri i ri që po na vihet?
Shqipëria është në një nga momentet më kritike të 33 viteve politikëbërje,
Jetojmë në momentet ku E Drejta e Pronës, E Drejta Jetës, E Drejta e Mendimit Ndryshe, E Drejta për të folur haptazi dhe pa frikë po shuhen çdo ditë.
Shkelja me të dyja këmbët e Kushtetutës është precedenti më i frikshëm i 33 viteve të pluralizmit politik.
Ku po shkojmë???”, shkruan Hysaj.
Discussion about this post