Këshilli Kombëtar i Partisë Demokratike në mbledhjen online që po zhvillon në praninë e 245 anëtarëve, vendosi sot të pezullojë nga funksioni Kryesinë e kësaj partie.
Sipas Këshillit Kombëtar, Kryesia e PD ka marrë vendime pa kuorum, ndërkohë që nuk ka marrë në konsideratë pasojat, që shkaktojnë dobësimin e mëtejshëm të partisë.
“Këshilli Kombëtar vërejti se të gjitha vendimet dhe qëndrimet e Kryesisë së Partisë duke filluar nga data 6 Qershor 2023, janë antistatutore, të marra pa kourum, dhe nuk kanë mbajtur në konsideratë pasojat që mund të sjellin në përçarjen dhe dobësimin e mëtejshme të partisë.
Aktet e Kryesisë së Partisë kanë arritur deri më aty sa kanë përdorur, falsifikuar dhe prodhuar në mënyrë të paautorizuar vulën e PD, përmes një vendimi nul dhe antistatutor.
Të gjitha këto vendime janë anulluar dhe Këshilli Kombëtar ka vendosur të pezullojë veprimtarinë statutore të Kryesisë së PDSH, deri në verifikimin e rregullshmërisë statutore të përbërjes së saj”, thuhet ndër të tjera në vendimin e Këshillit.
Më herët Këshilli Kombëtar vendosi të anulojë procesin zgjedhor të 29 korrikut, ku ishte njoftuar zgjedhja e kryetarit të ri të PD-së, në një garë formale mes Lulzim Bashës dhe Gjergj Hanit.
Gjithashtu Këshilli njohu dhe pranoi dorëheqjet e Lulzim Bashës dhe Enkelejd Alibeajt, ndërkohë që dorëheqjet e Agron Gjekmarkajt dhe Jorida Tabakut do të shqyrtohen në një tjetër mbledhje. Në kushte të tilla ato mbeten nënkryetarë të PD-së, pavarësisht se i qëndrojnë akteve të dorëheqjes.
Discussion about this post