Në Cetinjë të Malit të Zi ka mbërritur me helikopter dhe nën masa të forta sigurie, Mitropoliti Joanikije i cili pritet të emërohet në krye të kishës serbe. Ai është pritur me duartrokitje nga të pranishmit dhe me thirrje ‘I denjë’.
Ceremonia është parashikuar të mbahet në Cetinje të Malit të Zi, mirëpo ka pasur kundërshtime nga shumë qytetarë malazez përfshirë dhe drejtuesit më të lartë politik. Qindra policë ishin vendosur në kryeqytetin e vjetër të Malit të Zi rreth manastirit ku pritet të bëhet inagurimi, pikërisht për të shmangur incidentet. Pikërisht në fillim të rrugës që të çon për në manastir, qytetarët e Podgoricës kanë grumbulluar goma dhe kanë nxjerrë gratë në rreshtin e parë të turmës.
Kujtojmë se ditën e djeshme Mal i Zi është përballuar me protesta pasi sot është planifikuar ceremonia e marrjes së detyrës së mitropolitit të Kishës Ortodokse Serbe në Mal të Zi, Joanikije pas vdekjes së mitropolit të mëparshëm nga Covid-19.
Në tubim kanë marrë pjesë edhe kryeministri Zdravko Krivokapic, ministrat Milojko Spajic, Jakov Milatovic, Mladen Bojanic, Ratko Mitrovic, Aleksandar Stijovic dhe përfaqësues të Frontit Demokratik Andrija Mandic , Milan Knezevic, Slaven Radunovic, Strahinja Bulajic, udhëheqësi Prava Marko Milacic. Ata e shohin ceremoninë si një simbol të “pushtimit” të Malit të Zi dhe një përpjekje për ta futur Malin e Zi në të ashtuquajturën “botë serbe”.
Vetë Presidenti Milo Gjukanoviç ka qenë prezent në protest dhe ka paralajmëruar se do të dalë edhe sot nëse planet e Kishës nuk ndryshojnë. Ndërkohë që rreth manastirit mbahej protesta, Patriarku serb Porfir u prit brenda me një ceremoni solemne.
