Gjykata angleze ka dënuar me 1 vit burg një 22-vjeçar shqiptar për kultivim kanabisi. Bëhet fjalë për Eridon Hasanpapaj i cili u kap duke rritur bimët e kanabisit të cilat nëse do të hidheshin në treg do të kapnin vlerën e 50 mijë eurove.
Gjithashtu, bëhet me dije se Hasanpapaj është justifikuar para gjykatës se ai kishte marrë borxh personave që e kishin futur ilegalisht në Britaninë e Madhe dhe në këtë mënyrë i është dashur të punojë në kultivimin e drogës për t’u kthyer paratë mbrapsht.
Kur policia bastisi ‘shtëpinë e barit’ gjeti dy dhoma gjumi në katin e sipërm të ndërtesës të pajisura me ndriçim, ventilatorë dhe kohëmatës, ndërsa sahati i energjisë elektrike ishte hequr duke e vjedhur energjinë elektrike. Hasanpapaj u gjet i vetëm në banesë gjatë kontrollit të policisë, bëjnë me dije mediat angleze.
Atij i janë sekuestruar një portofol dhe një kartë identiteti. Edhe pse ai nuk bëri asnjë koment në polici kur u intervistua, me ndihmën e një përkthyesi shqiptar, i pandehuri 22-vjeçar, i cili nuk ka pasur dënime të mëparshme, pranoi se prodhonte një drogë të klasit B.
“Ai ishte borxhli ndaj atyre që e sollën në këtë vend dhe atij iu afruan disa persona në Londër, të cilët nuk flisnin shqip. Ata i thanë të hipte në një makinë dhe më pas e dërguan në ndërtesën ku rritej kanabisi. Atij iu dhanë udhëzime se çfarë duhet të bënte kur të mbërrinte në shtëpi. Duke pasur parasysh borxhin ai ndjeu se nuk kishte zgjidhje tjetër veçse të zbatonte udhëzimet që i ishin dhënë”.
Discussion about this post