Policia e Durrësit ka finalizuar me sukses operacionin e koduar “Led”, për parandalimin dhe goditjen e veprimtarisë kriminale në fushën e kultivimit të bimëve narkotike.
Si rrjedhojë në pranga ka rënë Eraldo Kokomani, 32 vjeç pasi e kishte përshtatur banesën e tij, për kultivimin e bimëve narkotike.
Sipas të dhënave zyrtare, janë zbuluar dy ambiente që dyshohet se shërbenin për kultivimin e bimëve narkotike, me llamba, po ashtu është proceduar penalisht edhe një efektiv, me akuzën e shpërdorimit të detyrës.
Si rezultat i kontrollit të banesave u sekuestruan në cilësinë e provës materiale:
186 gramë lëndë narkotike cannabis sativa dhe 360 fara cannabis sativa;
dy armë zjarri tip pushkë dhe 140 fishekë luftarak; dy aspiratorë, 15 llamba, 15 llamba me reflektor, 13 droslera, 10 reflektorë dhe dy automjete.
Materialet kalojnë për hetime të mëtejshme në Prokurorinë e Rrethit Gjyqësor Durrës, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e narkotikëve” dhe “Kultivimi i bimëve narkotike”.
Discussion about this post