Një pamje që flet vetë dhe një paradoks tipik “alla Tiranë”, përballë Drejtorisë së Policisë, aty ku ligji supozohet të jetë më afër se kudo tjetër. Lanës i është ndryshuar ngjyra, jo nga reshjet, por nga uji me çimento që tani derdhet lirshëm prej një ndërtimi pranë ish-Ekspozitës.
Pamjet tregojnë qartë rrjedhjen gri, që vjen nga tubat e një kantieri ndërtimi, duke u bashkuar me rrjedhën e Lanës si të ishte ndonjë kanal shkarkimi. Askush nuk duket të ketë vënë re, as policia që ka zyrat vetëm disa metra më tutje.
Banorët dhe kalimtarët që e shohin këtë skenë pyesin me të drejtë: kush e ka lidhur tubin me kanalet e Lanës? A ka leje për këtë shkarkim, apo është një tjetër “luks” i atyre që ndërtojnë pa frikë, me bindjen se nuk i prek askush?
Ironia është se aty ku duhej të niste kontrolli, ndotja po bëhet në dritë të diellit. Nëse do të kishte një simbol të qartë për mënyrën si funksionon zbatimi i ligjit në këtë vend, kjo rrjedhje gri në zemër të Tiranës do të ishte më kuptimplota.
Në fund të fundit, Lanës i kanë hedhur gjithçka ndër vite, tani edhe çimenton, dhe këtë herë, nën hundën e policisë.
Mesazhi i qytetarit:
Urdhëro se çfarë derdhet në Lanë mu para Drejtorisë së Policisë Tiranë. Ujë me çimento, nga ndërtimi që po bëhet te ish-Ekspozita etj. Bie fjala ai ndërtim, se kushedi kush e ka lidh tubin me kanalet e Lanës.
Discussion about this post