Kryebashkiaku i Kievit, Vitali Klitschko, deklaroi këtë të hënën, se pushtimi rus në Ukrainë prek drejtpërdrejt Gjermaninë.
Deklaratat ish-kampioni i botës në boks i bëri gjatë një vizite zyrtare në Hamburg, vend ku ai së bashku me të vëllain e tij Vladimir Klitscho kanë nisur karrierën në boks.
Gjithashtu Klitschko deklaroi se synimi i presidentit rus është rikrijojë Bashkimin Sovjetik.
“Dhe ju gjermanët, nuk duhet të harroni se një pjesë e Gjermanisë, ku Putin ka punuar me vite si agjent i KGB-së, ka qenë, po ashtu, pjesë e një perandorie më të madhe sovjetike ruse”, ka shtuar ai.
Ukraina tani është duke luftuar për të mbrojtur “secilin prej jush kundër Putinit”, ka thënë mes tjerash Klitschko.
“Ne, më përpara do të jetonim pa ujë dhe pa rrymë, sesa me ushtarë rusë. Ne jemi duke luftuar për të ardhmen tonë evropiane”, ka thënë ai, duke e përshkruar pushtimin jo si luftë, por si terrorizëm dhe gjenocid.
Discussion about this post