Klubi legjendar saudit dyfishon ofertën për Messin

Al Hilal i Riadit duket se është më afër transferimit të asit argjentinas Lionel Messi.

Kampioni i Botës me Argjentinën, në fund të këtij sezoni, do largohet nga PSG, dhe siç raportohet, e ardhmja e Messit do jetë larg Europës.

Duket e pabesueshme por Barcelona dhe Al Hilal janë në një garë të ashpër për blerjen e lojtarit nga Rosario.

Gara për nënshkrimin e tij është oferta më e madhe që i është bërë ndonjë futbollisti ndonjëherë, sipas Jaume Roures. Roures, i cili është kreu i Mediapro dhe mban të drejtat e transmetimit për La Liga, i tha Cadena SER se oferta e Messit ishte rritur.

Raportimet e mëparshme kishin vendosur shifrën në rreth 400 milionë euro për një kontratë dyvjeçare, por Roures deklaroi se ata e kishin rritur ofertën e tyre me 100 milionë euro shtesë.

Barcelona mendohet se ofron diku rreth 14 milionë euro në vit për Messin, mbi 35 herë më pak se sa Roures pretendon se Messi do të fitonte në Lindjen e Mesme.

Kujtojmë se Messi u largua nga Barcelona pas më shumë se 15 vjetësh në verën e vitit 2021 për t’u transferuar te Paris Saint-Germain.

Duhet theksuar se ai nuk e gjeti kurrë veten, si në shtëpi, në kryeqytetin francez, pa harruar se marrëdhënia me tifozët ka qenë e tensionuar, sidomos pas zhgënjimeve në Champions League (maksimumi që ka arritur me klubin është faza e 1/8 të turneut, në të cilën Messi nuk shënoi asnjë gol për PSG, në dy sezone).