IKMT ka shembur sot 2 biznese si në plazhin e Zvërnecit, të paralajmëruara që nga nisja e sezonit turistik. IKMT në bashkëpunim me policinë kanë prishur 2 strukturat edhe pse sipas pronarëve të tyre, ata janë ende në proces gjyqësor. Të dy pronarët e bizneseve janë shprehur në një prononcim për mediet të revoltuar ndërsa akuzojnë se askush nuk i dëgjoi për shqetësimin e ngritur prej tyre gjatë gjithë kësaj kohe. Prandaj, ata thonë se do të vazhdojnë të kërkojnë të drejtën, pasi ky veprim është antiligjor.
Sipas tyre, nëse do të bëhej fjalë për një projekt publik ku të përfshihej gjithë bregdeti nga Triporti në Zvërnec ata do ti prishnin vetë strukturat e shërbimit në plazh edhe pse janë aty prej gati 2 dekadash. Por selektimi po bëhet, sipas tyre, vetëm për interesa të personave të caktuar. Madje ata akuzojnë se po në atë zonë ndodhen edhe shumë biznese të tjera që para sezonit turistik kanë paralajmëruar se do të shemben, por ato akoma vazhdojnë të operojnë të lirë dhe asnjë masë nuk është marrë ndaj tyre.
Discussion about this post