Kryetari i Komisionit të Ligjeve, Ulsi Manja njoftoi se shumë shpejt PS do t’i drejtohet Kuvendit me disa propozime për të bërë ndryshime në Kodin Penal dhe atë Rrugor, teksa komentoi aksidentin e rëndë të ndodhur në Durrës.
Ai theksoi se Nikoll Radaci, 57-vjeçari që përplasi për vdekje dy të miturit dhe plagosi rëndë një tjetër teksa lëvizte me makinë i dehur, duhet të marrë dënimin e merituar, por shtoi se është përgjegjësi e institucioneve që të adresojnë ndryshime në Kodin Rrugor.
“Ky komision ka përgjegjësinë që këtë shqetësim që ka krijuar kjo ngjarje ta përkthejë në ndryshime ligjore. Së bashku me disa kolegë të mazhorancës do t’i drejtojmë Kuvendit shumë shpejt dhe do të propozojnë ndryshime në Kodin Rrugor dhe atë Penal si kundërpërgjigje adekuate të kësaj situate.
Nuk do të duhet të ndodhin ngjarje të tilla për të ashpërsuar masat, por po shohim të gjitha hapësirat e boshllëqet që ka Kodi Rrugor dhe Penal për t’i adresuar në masën e duhur. Në rrafshin njerëzor, ngjarja është shumë e rëndë dhe autori i kësaj vepre penale nuk meriton të jetë më mes nesh dhe të marrë ndëshkimin shembullor sipas ligjit”, tha Manja.
Por për deputetin demokrat, Arian Ndoja, ligji ekziston në vendin tonë, por nuk zbatohet.
“Për mendimin tim, ne e kemi ligjin, 5-20 vite, por nuk zbatohet. Ky dënim nuk e ka asnjë vend tjetër europian. Në atë lagje duhet të ketë edhe sheshe, edhe lojëra. E dimë që nuk i ka. Aty ka rrugë që janë shtruar nga vetë banorët më beton”, tha Ndoja.
Discussion about this post