Finalizohet një tjetër operacion policor në portin e Durrësit ku janë kapur 31 pako me lëndë narkotike kokainë, me peshë totale 33.5 kilogramë.
Ndërkohë, policia e Durrësit ka shoqëruar 8 persona, pjesëtarë të firmës që priste ngarkesën me banane dhe punonjës të skanerit në Portin e Durrësit.
Ishte qeni anti-drogë ai që zbuloi kokainën mes bananeve, të cilat janë të kompanisë “Bana King”, ku janë kapur edhe më herët sasi kokaine në banane.
“Në vijim të operacioneve të njëpasnjëshme të zhvilluara në Portin e Durrësit, kanë organizuar dhe finalizuar operacionin policor të koduar “Again”. Shërbimet e Policisë, bazuar në informacionin policor të administruar nga Policia shqiptare, kanë ushtruar kontroll të imtësishëm në një kontenier të ngarkuar me banane, që kishte ardhur nga Ekuadori, për llogari të një firme në Tiranë, duke qenë se nga kontrolli me skaner nuk ishte konstatuar ngarkesë tjetër përveç arkave me banane. Si rezultat i kontrollit me qen antidrogë, shërbimet e Policisë konstatuan në 2 arka bananesh, 31 pako, të mbushura me lëndë të dyshuar narkotike kokainë, me peshë totale 33.5 kilogramë.” – njofton policia.
Nën drejtimin e Prokurorisë, strukturat hetimore të Policisë së Shtetit vijojnë veprimet për zbardhjen e këtij rasti dhe për vënien përpara përgjegjësisë ligjore të personave përgjegjës, shtuan të njëjtat burime.
Discussion about this post