Kryetari i Parlamentit të Kosovës Glauk Konfujca është shprehur se Serbia po kërcënon stabilitetit e Kosovës dhe rajonit. Deklaratat i bëri në takimin e nëntë të Komisionit Parlamentar për Stabilizim-Asociim BE-Kosovë. Duke komentuar grumbullimin e ushtrisë serbe në kufi me Kosovën ai tha se këto nuk janë mesazhe që vijnë nga një vend që kërkon të ruajë raporte të mira me fqinjët. Kryeparlamentari i bëri thirrje Bashkimit Europian që ti dënojë këto veprime të Serbisë.
“Republika e Kosovës në politikat e saj strategjike të orientimit rreshtohet fuqishëm me ato të Bashkimit Evropian, Shteteve të Bashkuara të Amerikës dhe NATO-s për paqe dhe stabilitet… Ne duam paqen dhe stabilitetin në rajonin tonë, por jemi plotësisht të vetëdijshëm se paqen dhe stabilitetin po e kërcënon dhe minon Serbia. Ta zëmë, koncentrimi i këtyre ditëve të fundit i forcave ushtarake të Serbisë dhe grumbullimi i tyre përgjatë kufirit me Kosovën nuk është mesazh dhe porosi i një shteti që dëshiron të ndërtojë marrëdhënie të mira fqinjësore me Kosovën. Prandaj si veprim i tillë duhet të dënohet prej të gjithëve, duke përfshirë edhe Bashkimin Evropian”, tha ai.
Deklaratat e Konjufcës vijnë pas tensioneve të rritura në Veri të Kosovës që erdhën pas futjes në fuqi të reciprocitetit të targave. Shkarkimi i drejtorit të Policisë në Veri duket se i ka shtuar këto tensione ku ka pasur reagime të shumta nga të dyja palët.
Shkarkimi i drejtorit të Policisë në Veri të Kosovës Nenad Gjuriç vjen pas refuzimit të këtij të fundit për të vendosur letra qortuese ndaj shoferëve që nuk zbatojnë vendimin e qeverisë për targat. Ditën e djeshme ai u paralajmërua me shkarkim nga Policia e Kosovës ndërkohë ditën e sotme u mor dhe vendimi për shkakrimin e tij. Marrëveshja për reciprocitetin e targave është shoqëruar me tensione të shumta në Veri duke bërë që Policia e Kosovës të jetë në gatishmëri dhe të marra masa shtesë për rendin dhe sigurinë. Gjithashtu dhe trupat e KFOR kanë bërë me dije se po monitorojnë situatën dhe janë në gatishmëri për të vepruar në rast se rrezikohet stabilitetit. Mes Kosovës dhe Serbisë kanë nisur akuzat e ndërsjellta ndërkohë që ushtria serbe është vënë në “alarm të kuq” për çdo rast.
Discussion about this post