Misteri mbi kontejnerin me kokainë që u kap në Durrës dhe destinacion kishte Tiranën, lidhet me faktin se si ndodhi që ai të dilte i pastër nga skaneri edhe pse brenda kishte drogë.
Në njoftimin e policisë, nuk jepen detaje se pse doli i pastër në skaner kontejneri me drogë dhe as nëse e lanë të kalonte për të kapur porositësit. Pikërisht kjo gjë tregon se duhet zbardhur përse skaneri nxori të pastër një kontejner që kishte brenda jo pak por 119 kilogram kokainë.
Burime bëjne më dije se gjithçka ka nisur në një nga portet e Ekuadorit ku një kompani që importon banane nga Amerika Latine kishte bërë porosinë e radhës. Krahas bananeve, në kontejnerin frigoriferik ishin futur edhe sasi e madhe lënde narkotike kokainë. Grupet kriminale kanë ndjekur rrugëtimin disa javor të kontejnerit nga Ekuadori për në portin Gioia Tauro në Itali.
Kontejneri është hapur pikërisht në këtë port dhe fillimisht ndërhyrja është konstatuar nga autoritetet e portit, të cilët njoftuan policinë se kishte ndodhur një vjedhje e arkave me banane nga kontejneri me destinacion Shqipërinë. Pas verifikimit të procesverbalit të nisjes dhe konstatimit të arkave me banane prezente, policia ka bërë një procesverbal tjetër ku ka shënuar se kontejneri u gjet i hapur, pa plumbçen që shërben si vulë dhe se nga ai ishin vjedhur një sasi e madhe bananesh pa bërë fjalë për lëndë narkotike.
Dyshohet se sasia e madhe e bananeve, të cilat janë hequr nga kontejneri janë kokainë e vjedhur nga një grup kriminal, i cili kishte dijeni për prezencën e saj aty.
Policia dhe autoritetet e portit të Gioia Tauro bën mbylljen e kontejnerit dhe bashkë me procesverbalin përkatës e nisin konteinerin për në portin e Durrësit, ku edhe do të dilte i pastër në skaner.
Discussion about this post