“Nuk mund ta kuptoj madhësinë e asaj që kam bërë. E kuptoj që do të humbas gjithçka.” Me këto fjalë, violinisti shqiptar Beng Bakalli iu drejtua gjykatës në Francë, pasi u arrestua në La Turbie me 38.3 kilogramë kokainë të fshehura në automjetin me të cilin po udhëtonte drejt Italisë.
Bakalli, 45 vjeç, violinist profesionist dhe pjesë e orkestrës simfonike Victor-Hugo Bourgogne Franche-Comté, ka dhënë para hetuesve dhe gjykatës versionin e tij për mënyrën se si u përfshi në transportin e drogës.
Sipas medias franceze Nice Matin, ai ka deklaruar se kishte pranuar ta transportonte ngarkesën kundrejt një pagese prej 20 mijë eurosh.
Bakalli ka thënë se kontakti për këtë transport kishte ardhur përmes disa personave që kishte njohur gjatë një udhëtimi në Shqipëri. Ai ka mohuar se ishte kërcënuar apo detyruar të merrte përsipër transportin.
Violinisti gjithashtu ka pretenduar se nuk kishte dijeni të plotë për personat e tjerë të përfshirë në aktivitet dhe se automjeti Citroën C5 Aircross, ku u gjet droga, i ishte dhënë nga një garazhist spanjoll.
Policia dhe doganat franceze e ndaluan në La Turbie teksa po udhëtonte drejt Italisë. Gjatë kontrollit, oficerët dyshuan për një pjesë të modifikuar poshtë tapetit në anën e pasagjerit.
Kontrolli më i detajuar zbuloi dy ndarje të fshehta të ndërtuara në dyshemenë e automjetit, ku ishin vendosur 38.3 kilogramë kokainë. Vlera e drogës në tregun e paligjshëm përllogaritet në rreth 2 milionë euro.
Hetuesit kanë ngritur pikëpyetje nëse ky ishte vërtet transporti i parë i Bakallit, duke marrë parasysh sasinë e madhe të kokainës dhe mënyrën e sofistikuar të fshehjes së saj.
Pas arrestimit, autoritetet kontrolluan edhe banesën e tij në Franche-Comté.
Atje u gjetën katër armë zjarri, dy pushkë, një jelek antiplumb, qindra fishekë dhe 88,900 euro të paketuara në kartëmonedha 50-euroshe.
Edhe për këto gjetje, Bakalli dha shpjegimet e tij.
Për armët, ai deklaroi se ishte i regjistruar si qitës sportiv. Sipas autoriteteve franceze, megjithatë, jo të gjitha armët rezultonin të deklaruara.
Për shumën prej 88,900 eurosh të gjetur në banesë, violinisti pretendoi se paratë i kishte marrë si dhuratë nga babai i tij.
Prokuroria shfaqi skepticizëm ndaj këtyre shpjegimeve dhe kërkoi që Bakalli të qëndronte në paraburgim, duke argumentuar se sasia e drogës, mënyra e organizimit të transportit dhe sendet e gjetura në banesë ngrinin dyshime për një veprimtari më të strukturuar.
Prokurorja i kërkoi gjykatës të mos ndikohej nga profili profesional i të pandehurit si muzikant dhe nga karriera e tij në institucione prestigjioze, por të merrte në konsideratë rrethanat konkrete të çështjes.
Avokatja e Bakallit, nga ana tjetër, vuri në dukje integrimin e tij në shoqëri dhe karrierën e gjatë profesionale në muzikë.
Gjykata vendosi që ai të qëndrojë në paraburgim dhe procesi ndaj tij pritet të nisë në tetor.
Nëse shpallet fajtor për akuzat që rëndojnë ndaj tij, Bakalli rrezikon deri në 10 vjet burg.
Në fund të seancës, përpara se trupi gjykues të tërhiqej për të marrë vendimin, violinisti shqiptar shprehu pendesë për situatën në të cilën ndodhej.
“Nuk mund ta kuptoj madhësinë e asaj që kam bërë. E kuptoj që do të humbas gjithçka”, tha ai.
gijotina.com/
Discussion about this post