Djali i ish-kryeministrit Sali Berisha, Shkëlzen Berisha dhe ish-ministri i Brendshëm, Flamur Noka janë fotografuar në shoqërinë e klanit mafioz “Osmani”, që është një ndër transportuesit më të mëdhenj të kokainës në Evropë.
Ka qenë Gazeta Tema që ka publikuar disa foto të Shkëlzen Berishës në shoqërinë e anëtarëve të klanit “Osmani” në vitin 2016 në Ritzi Restaurant Puerto Portals. Gjithashtu në shoqërinë e këtyre personave është fotografuar edhe ish-ministri i Brendshëm Flamur Noka, i cili është një nga personat më të afërt të Berishës pasi ish-kryeministri u përjashtua nga PD.
Kujtojmë se, disa ditë më parë në një operacion ndërkombëtar në disa shtete të Evropës, u arrestuan 45 persona, nga të cilët 30 shqiptarë, mes të cilëve edhe disa anëtarë të ashtuquajturit “klani Osmani”.
Ky klan ishte një nga rrjetet më aktiv në Evropë që merrej me trafikimin e kokainës, duke importuar lëndën narkotike nga Amerika Latine, ndërsa më pas e shisnin me shumicë. Në Belgjikë u bënë 30 arrestime dhe u sekuestruan 1.3 milionë euro. Gjithashtu aty u sekuestruan një duzinë armësh të lehta, dy me silenciator, dhjetë kilogram kokainë, 13 automjete dhe 1 mijë litra përzierës për përgatitjen e drogës.
Grupi i rrezikshëm kriminal i tipit mafioz kishte krijuar një sërë kompanish në Majorka, Gjermani dhe Kroaci për të pastruar fitime të mëdha të paligjshme, duke përdorur emra të parë, pajisje komunikimi të koduara dhe duke bërë udhëtime të rregullta në Dubai, Meksikë dhe Kolumbi.
Discussion about this post