Komandanti KFOR-it, gjeneralmajor Ferenc Kajari, ka deklaruar ditën e sotme se ka rrezik që tensionet në veri të Kosovës të shtohen. Gjatë javës ai është takuar me kryeministrin e Kosovës, Albin Kurti dhe Goran Rakiç, kryetar i Partisë Lista Serbe, si dhe kryetarët e katër komunave veriore të Kosovës. Komandanti i KFOR-it diskutoi situatën e sigurisë në veri të Kosovës dhe i informoi palët për aktivitetet dhe përpjekjet e vazhdueshme të KFOR-it për të vazhduar sigurimin dhe lirinë e lëvizjes dhe parandalimin e çdo përshkallëzimi të situatës.
Sipas një komunikate të KFOR-it, gjenerali Kajari tha se KFOR-i mbetet plotësisht i fokusuar në zbatimin e përditshëm të mandatit të tij, bazuar në Rezolutën 1244 të Këshillit të Sigurimit të Kombeve të Bashkuara të vitit 1999, për të siguruar një mjedis të sigurt dhe lirinë e lëvizjes për të gjitha komunitetet në Kosovë.
Ai ka bërë të qartë se trupat e KFOR-it nuk kanë qenë të angazhuara në aktivitete stërvitore me Policinë e Kosovës dhe Forcat e Sigurisë së Kosovës, siç thuhet gabimisht në disa raportime mediatike. Ai përsëriti gjithashtu se KFOR-i i monitoroi me shqetësim postblloqet në veri të Kosovës më 31 korrik dhe rikujtoi rrezikun që një situatë kaq e tensionuar të shndërrohet në incidente të dhunshme.
Discussion about this post