Në pak vite, Presidenti ynë i Republikës merret seriozisht me lojtarët e ekipeve kombëtare. Së fundmi, rasti Rrahmani dhe diskriminimi i praktikave të tjera të z. Begaj për mbi 10 lojtarë dhe lojtare që kërkojnë shtetësinë dhe pasaportën shqiptare lë hije të mëdha dyshimi.
Rasti i fundit, i denoncuar nga FSHF dhe vetë zyrtari i saj, Osmani, konstaton edhe një herë bllokimin de jure e de facto që Presidenti i Republikës u bën ekipeve kombëtare. Standardi i dyfishtë, gjoja në emër të ligjit, për plotësimin e vakuumit ligjor për praktikat e lojtarëve të kombëtareve të moshave, që FSHF kërkon t’i afrojë në ekipet zinxhir, bllokohet nga Presidenca.
Kjo është hera e dytë që Presidenti Begaj provokon me çënim të drejtpërdrejtë ekipet kombëtare, për arsye që i di vetëm ai.
Në një situatë të tillë, teksa plotësohet praktika për futbollistin Albion Rahmani (dhe shumë mirë që finalizohet), Begaj bllokon të gjitha rastet e tjera për futbollistë shqiptarë nëpër botë, që vendosin të luajnë për Shqipërinë.
Nuk dua kurrsesi ta besoj që këtu në mes ka një interes material, moral apo politik, për asnjë arsye, por këtij dopio-standardi i duhet dhënë patjetër një shpjegim publik nga vetë Presidenti ynë i nderuar: pse e kap me lojtarët shqiptarë dhe pse bëhet pengesë serioze si institucion për pasaportizimin e atyre të rinjve e të rejave që kanë vendosur, aspak lehtësisht, të pranojnë të luajnë me Shqipërinë.
Begaj sërish ngre digën, aty ku do, për ata që do, për arsyet që ka, apo edhe për influencën në këmbim që mund të marrë.
Zoti President!
Mos e bëj armik ekipin kombëtar!
Është e dyta herë që tenton të bllokosh, duke dhënë jopublikisht ende një arsye ligjore si mungesë. Por, krejt ndryshe, nuk standardizon të njëjtin argument për një praktikë tjetër që ti e kreve pa asnjë “motiv mungues” ligjor.
Janë shqiptarë të gjithë, President! Nuk mund dhe nuk është aspak e nevojshme të komportohesh me kapriçio institucionale me standarde të ndryshme. Dhe pikërisht këtu, në të vetmin aneks ku mund të jesh partner me sportin, pikërisht këtu, për kapriço dhe burokraci ushtarake, bën bllokadë.
Nëse këtë fakt e konsideron serioz, zoti President, atëherë futbollit i detyrohesh një shpjegim publik!
Nëse kjo shpullë që i jepni fëmijëve shqiptarë nëpër botë dhe familjeve të tyre, që duan një pasaportë e më pas një fanellë për të luajtur me ekipet kombëtare, ju duket e drejtë, sërish i detyroheni një shpjegim institucional publik.
Është e vetmja portë ku mund të bëni diçka si President i një shteti të brishtë, dhe jo të interpretoni ligjin me dopio-standarde në raport me lojtarët e ekipeve kombëtare.
Mos e zhbëni, për asnjë arsye, atë zotnillëk tuajin që transmetoni nga ekrani, nga burokracitë afër kabinetit tuaj apo nga interesa meskine rreth jush.
Që e ritheksoj, nuk dua ta besoj që ju bllokoni praktikat shqiptare të pasaportave, se pas tyre mund të fshihet diçka që nuk duhet kurrsesi t’ju bëjë objekt dhe subjekt aludimesh.
Zoti President!
Hapini rrugë të rinjve e të rejave në botë të luajnë me ngjyrat e ekipeve kombëtare. Mos i pengoni të zgjedhin fanellën e kombit, mos i lini pas portave të burokracisë, që mesa duket ka infektuar edhe kangjellat dhe është afruar afër skrivanisë tuaj!
Discussion about this post