Komisioneri Publik ka ankimuar vendimin e Komisionit të Pavarur të Kualifikimit, për lënien në detyrë të prokurorit së Rrethit Gjyqësor Gjirokastër, Juljan Çafka.
Në një njoftimin zyrtar, thuhet se Komisioneri Publik ka konstatuar që në hetimet e bëra nga KPK-ja, nuk janë përfshirë disa çështje që kanë nevojë për hetim të mëtejshëm. Me këtë argument Komisioneri Publik i është drejtuar Kolegjit të Posaçëm të Apelimit për riçelje hetimesh për subjektin në fjalë.
Komisioni i Pavarur i Kualifikimit, pas rikonfirmimit në detyrë të Çafkës vendosi të transferojë pranë Inspektorit të Lartë të Drejtësisë dy çështje të hetuara prej prokurorit Çafka në vitet 2018 dhe 2019 , për “inspektim të shkaqeve që mund të përbëjnë shkelje disiplinore”.
Gjatë seancës dëgjimore, Komisioni evidentoi disa çështje të denoncuara nga publiku ku janë konstatuar mangësi në hetimet e kryera nga drejtuesi i Prokurorisë së Gjirokastrës. Çafka dha shpjegime lidhur me dy çështjet e hetuara prej tij, të verifikuara në kuadër të dyshimeve të ngritura nga DSIK për veprime korruptive. Ndërkohë, nuk u relatuan probleme domethënëse në kriterin e pasurisë.
Discussion about this post