Përfundoi mbledhja e Komisionit Hetimor për zgjedhjet e 25 prillit, mes debateve të shumta. Pas largimit të maxhorancës nga mbledhja, Kuvendit fiku sinjalin edhe pse kreu i Komisionit kërcënoi stafin se do t’i kallëzonte penalisht. Megjithatë demokratët nuk lëvizën nga ambientet e Byrosë duke u futur “Live” nga Facebook i Partisë Demokratike. Gjithçka nisi pas debatit që agravoi mes palëve nisi me kërkesën e deputetëve të Partisë Socialiste që në rendin e ditës të futet shqyrtimi i rregullores dhe rendi të kalohet në votim.
Kjo kërkesë u pranua nga kryetari i Komisionit, Enkelejd Alibeaj, por nuk gjeti dakordësinë, duke u votuar me 6 vota pro dhe 8 kundër nga palët. Ndërkohë që socialistët kërkuan që të zgjidhet edhe Sekretari i Komisionit, duke propozuar emrin e Klevis Xhoxhit. Pas kësaj socialistët kërkuan 5 minuta pushim, kërkesë e cila u pranua nga Alibeaj, ndërsa raportimin brenda në sallë e vazhdoi sekretari i Përgjithshëm i Partisë Demokratike, Gazment Bardhi.
Me të parë që diskutimi vijonte, socialistët nisin që të replikonin duke lënë mbledhjen për herë të dytë dhe përfundimisht. Edhe pse maxhoranca u largua, Alibeaj dha urdhër që mbledhja të vijonte edhe pa PS, por administrata e Kuvendit ndërpreu sinjalin e mbledhjes për transmetim për mediat. Kjo shkaktoi debate të ashpra dhe kërcënime nga ana e deputetit demokrat.
Mbledhja e sotme vjen pas dështimit të mbledhjes së 5 ditëve më parë, e cila u mbyll pa një vendimmarrje. Në këtë Komision që ka afat deri në janar, pritet që të dëshmojë edhe kryeministri Edi Rama, zv.kryeministri Arben Ahmetaj, 4 ministra dhe gazetarë e drejtues të institucioneve kryesore ligjzbatuese në vend.
Në fund, pritet që të dilet në një përfundim lidhur me pretendimet e Partisë Demokratike, për manipulim të vullnetit të votuesve më 25 prill, ndërsa pretendojnë se ka ndodhur e ashtuquajtura “masakra zgjedhore”.
