Vincent Kompany, trajneri i Anderlecht, ka dalë para mediave dhe ka folur për duelin që kanë nesër prej orës 19:00 në “Elbasan Arena” me Laçin. Belgu, një yll te Manchester City si futbollist vite më parë, foli për kurbinasit.
“Kur je në krye të Anderlecht ka gjithmonë presion, herë më pak e herë më shumë. Gjithmonë ka ambicie ky klub dhe nuk kemi zgjedhje, duhet të shkojmë sa më lart të mundemi. Futbolli është futboll dhe rivalët duhen respektuar, por objektivat tona janë qarta, gjithmonë luajmë për fitore.
Pashë dy ndeshjet e fundit që luajtën, si dhe pata mundësinë të rishikoja videot më pas. Kam nivelin e duhur të informacionit për kundërshtarin. Shumicën e kohës ishte një skuadër që i duhej të mbrohej.
Luajtën mirë, luajtën si vëllezër në fushë, përdorën mirë rastet. Çdo gjë shkoi mirë, që ata të ishin këtu sot. E meritojnë kualifikimin. Unë e kuptoj që nuk mund të ndryshoj dot recetën e suksesit të tyre brenda natës”, tha mes të tjerash Kompany.
Mediat belge raportuan se ai nuk do të ishte në pankinë nesër, për shkak se nuk ka licencën UEFA Pro. Gjithsesi Kompany ka sqaruar gjithçka: “Çdo gjë është në rregull, është burokraci. Kur ke të bësh me futboll dhe institucione, ke të besh me shumë burokraci”.
