Ministrja e Arsimit, Sportit dhe Rinisë, Evis Kushi, publikoi sot një pjesë të koncertit recital në violinçel të nxënësit të talentuar të liceut artistik “Jordan Misja” në Tiranë, Klaudio Zoto.
Ministrja Kushi thekson se Zoto është fitues i një sërë çmimesh dhe pjesëmarrës në aktivitete të shumta ndërkombëtare.
“Mirëmëngjes dhe uroj një të dielë të qetë, me një pjesë të recitalit të para pak ditëve të talentit Klaudio Zoto, nxënës i liceut artistik “Jordan Misja” në Tiranë”, – shprehet Kushi.
Duke folur për nxënësine talentuar Zoto, ministrja Kushi thekson se “ai ka filluar të luajë violinçel që në moshën 6-vjeçare, numëron deri më sot shumë koncerte recitale, ka përfaqësuar Shqipërinë për herë të parë në “Eurovision Young Musicians”, fitues i një sërë çmimesh dhe pjesëmarrës në aktivitete të shumta ndërkombëtare”.
Ministrja Kushi nuk rri pa përgëzuar edhe liceun artistik “Jordan Misja” në Tiranë, shkollë e cila vazhdon të jetë gjithmonë një fabrikë që prodhon dhe kultivon talente të spikatura në art e muzikë.
