Gjatë nëntëmujorit të vitit 2025, pagesat për kontratat koncesionare arritën në 9.61 miliardë lekë (rreth 100 milionë euro), që përbëjnë 69% të planit vjetor, sipas të dhënave të Ministrisë së Financave. Muaji shtator regjistroi nivelin më të lartë të pagesave me 2.14 miliardë lekë, ku kontrata për “Rrugën e Arbrit” zuri pjesën kryesore me rreth 1 miliard lekë, ose 47.1% të totalit të atij muaji.
Në krahasim me të njëjtën periudhë të vitit 2024, pagesat u rritën me 289.5 milionë lekë, ose 3.1% më shumë. Rritja është ndikuar kryesisht nga kontratat e mëdha infrastrukturore “Autostrada Milot–Morinë”, me 277.8 milionë lekë më shumë, dhe “Rruga Porti i Jahteve – By Pass Orikum – Dukat (Ura e Shën Elizës)”, me 171.9 milionë lekë shtesë. Ndërkohë, është vërejtur ulje e pagesave për projektin e infrastrukturës arsimore në Bashkinë Tiranë, me 347.8 milionë lekë më pak se një vit më parë.
Për gjithë vitin 2025, fondet e planifikuara për kontratat koncesionare dhe partneritetet publike–private arrijnë në 13.93 miliardë lekë, nga të cilat 8.34 miliardë janë shpenzime korrente dhe 5.59 miliardë për investime. Ky plan rezulton 4.77% më i lartë se pagesat faktike të vitit 2024, që ishin 13.29 miliardë lekë, duke reflektuar një rritje prej rreth 634.6 milionë lekësh.
Discussion about this post