Edhe pse institucionet heshtin me urdhër të Ramës dhe Ballukut, Kontrolli i Lartë i Shtetit (KLSH) ka nxjerrë zbuluar aferën e ministres me Florenc Gjikurinë për rrugën me koncesion në Vlorë. Kontrata PPP quhet zyrtarisht “Ndërtimi dhe Mirëmbajtja e Segmentit Rrugor Porti i Jahteve – Bypass Orikum – Dukat (Ura e Shën Elizës)”. Ky koncesion iu dha në nëntor të viti 2018 kompanisë “Gjikuria Shpk”, pa konkurrim dhe kontratat u nënshkrua për 13 vjet. Sipas dokumenteve kjo firmë do të merret me ndërtimin dhe më pas mirëmbajtjen e këtij aksi rrugor për 13 vjet. Ndërsa më tutje janë përcaktuar edhe vlerat që do të marrë kompania për shërbimet që do të japë në vazhdim. Por, sa para i ka dhënë ministrja Gjikurisë? Më shumë se sa duhej! Pikërisht te llogaritja e fondit limit për këto shërbime KLSH ka evidentuar parregullsi dhe abuzim.
Konkretisht, KLSH ka treguar se në pikën për mbikëqyrje të punimeve, në kontratë janë bërë disa gabime në përllogaritje që kanë çuar në shtesë të fondit, më shumë nga normalja. Sipas dokumentit, për këtë shërbim është lënë në dispozicion fondi 232,197,510.15 lekë me TVSH, por sipas KLSH nga përllogaritjet në detaje të të gjithë zërave të këtij lloj shërbimi, kosto mund të arrinte në vlerën 45,267,510.15 lekë me TVSH. Nga një përllogaritje e thjeshtë rezulton se pagesa e rimbursuar e këtyre shërbimeve është me shtesë 186,930,000 lekë. Ndërsa rregulli në procedurë kërkon që shtesa për këto shërbime të rimbursuara nuk duhet të jetë më shumë se 31,234,582 lekë. Në përfundim rezulton se vetëm për mbikëqyrjen e shërbimeve janë dhënë 155,695,418 lekë me TVSH më shumë nga sa nevojiten realisht.
Në këtë kuadër, KLSH kërkon që brenda këtij viti Ministria e Infrastrukturës dhe Energjisë, të marrë masa, të analizojë me grup pune të veçantë, shkaqet dhe arsyet e rritjes së shpenzimeve të rimbursueshme në vlerën 155,695,418 lekë me TVSH dhe të ndiqen të gjitha procedurat administrative. Si dhe të sigurojë sa më parë likuidimin e kësaj shume që po merret nga taksat e qytetarëve.
Fitues i paracaktuar
Ky koncesion është denoncuar më herët nga mediat për kontratën korruptive në shkelje të ligjit që po bënte Balluku me Gjikurinë, por ministrja arriti të manipulonte abuzimin. Këtë herë është KLSH që, gjithashtu vë në dukje se ky koncesion është dhe në mungesë të konkurrencës. Sipas audituesit, ministrja ka neglizhuar specifikimin e disa kritereve, duke bërë që ato të jenë të paqarta për operatorët, çka rrjedhimisht i ka skualifikuar ato nga gara. Në raport thuhet se, këto kritere janë lënë qëllimisht të paargumentuara për të cunguar konkurrencën, duke lënë vend për dyshim se fituesi ka qenë i paracaktuar.
“Komisioni ka hartuar dokumentet e procedurës konkurruese por nuk kanë argumentuar vendosjen e çdo kriteri për kualifikim. Gjithashtu nuk argumentohet ndarja e inxhinierëve, që disa inxhinierë duhet të jenë drejtues teknik në licencën e shoqërisë dhe pse 2 inxhinierë të jetë jashtë licencës së shoqërisë. -Në lidhje me pikën 2.3.11, ku kërkohet që për zbatimin e projektit ofertuesi duhet të këtë në pronësi ose me qira minimumi makinerive si në DPK, nuk argumentohet sasia e vendosjes së tyre, në lidhje me projekt idenë, pasi projekt-zbatimi nuk është i realizuar. Në listën e mjeteve me qira/ Huapërdorje/ furnizimi, kërkohet Gurëthyes stacionare”, thuhet në raport. Ndërsa, në mënyrë urgjente KLSH rekomandon që të marrë masa që çdo kriter kualifikues të jetë në përputhje me natyrën dhe përmasën e kontratës, në mënyrë që të stimulohet konkurrenca.
Qeveria merr borxh për Gjikurinë
Përveç taksave të qytetarëve, në këto 8 vitet e fundit, Shqipëria ka shtuar dhe borxhet e marra nga institucionet ndërkombëtare për të financiar këto projekte me PPP. Huamarrjet nga BERZH, Banka Botërore, CEB, IDB etj., duke u bërë dhe forma më e përdorur për financimin në infrastrukturë nga qeveritë e shkuara për shkak të normave të buta të interesit. Sipas dokumenteve të publikuara për çdo huamarrje, një interes prej 5% po paguhet për ndërtimin e rrugës Porti i Jahteve – Dukat-Orikum.
Gjikuria, si kompani fituese ka arritur që ta financojë ndërtimin e rrugës përmes një kredie me vlerë 25.6 milionë euro, të marrë në një marrëveshje me tri banka: “Intesa San Paolo”, “OTP” dhe “Tirana Bank”, kundrejt një interesi 6%. Për të balancuar shumën e interesit që do të paguajë nga kredia e marrë, kompania vendosi që të aplikojë për shtetin një tjetër interes prej 5% për 21.7 milionë eurot që do të financojë vetë në këtë segment, duke bërë që shteti të paguajë 17.2 milionë euro interesa për kontratën. Kështu llogaritja gabim e fondit limit që cituam pak më sipër, ndikon edhe në interesit të lartë bankar që duhet të paguhet për këtë koncesion. I lumtë Belindës dhe Gjikurisë, përderisa SPAK-u akoma nuk është zgjuar!/ Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post