UEFA, Konfederata Aziatike e Futbollit (AFC) dhe Concacaf kanë publikuar një deklaratë të përbashkët kundër presidentit të FIFA-s, Gianni Infantino.
Tre konfederatat kanë kritikuar mënyrën se si po drejtohet futbolli ndërkombëtar, duke theksuar se ky sport nuk i përket asnjë individi apo institucioni.
Në deklaratë, drejtuesit e tre konfederatave nënvizojnë se zhvillimi i futbollit ka ardhur si rezultat i punës së përbashkët të FIFA-s, konfederatave dhe federatave anëtare.
Ata kundërshtojnë idenë që vendimet për të ardhmen e futbollit të merren nga një person i vetëm.
“Udhëheqja në futboll nuk është pronë. Është një detyrë shërbimi ndaj familjes që ia beson këtë përgjegjësi”, thuhet në deklaratë.
Kritikat ndaj Infantinos vijnë në një periudhë tensionesh të mëdha brenda futbollit ndërkombëtar.
Sipas raportimeve nga mediat britanike, UEFA, AFC dhe Concacaf kanë diskutuar edhe mundësinë e krijimit të turneve alternative ndaj kompeticioneve të FIFA-s.
Bëhet fjalë për një ide ende në fazë diskutimi dhe nuk ekziston aktualisht një projekt konkret për organizimin e tyre.
Qëllimi do të ishte krijimi i më shumë mundësive për përballje ndërkombëtare dhe reduktimi i varësisë nga FIFA.
Në deklaratë, tre konfederatat kërkojnë gjithashtu një shpërndarje më të përgjegjshme të rezervave financiare të FIFA-s për zhvillimin e futbollit.
“Kur besimi thyhet përmes mashtrimit dhe një individ vendos veten mbi kolektivin që i besoi autoritetin, ajo detyrë është braktisur”, thuhet më tej.
Në fund, UEFA, AFC dhe Concacaf bëjnë thirrje për unitet dhe për një udhëheqje që t’i shërbejë futbollit, e jo ta kontrollojë atë.
Discussion about this post