Shtetet e Bashkuara kanë konfirmuar zyrtarisht nënshkrimin dhe ratifikimin nga Shqipëria të një kredie prej 302 milionë dollarësh në kuadër të programit të Financimit të Huaj Ushtarak (Foreign Military Financing – FMF).
Sipas njoftimit të autoriteteve amerikane, fondet do të shërbejnë për të mbështetur angazhimin e Shqipërisë në përmbushjen e objektivave të mbrojtjes të dakordësuara në Hagë, të cilat parashikojnë rritjen graduale të shpenzimeve për mbrojtjen në 5% të Prodhimit të Brendshëm Bruto deri në vitin 2035.
Kredia do të përdoret për modernizimin e Forcave të Armatosura të Shqipërisë, përmes blerjes së pajisjeve dhe kapaciteteve ushtarake me origjinë nga Shtetet e Bashkuara, duke synuar njëkohësisht forcimin e aftësive mbrojtëse të aleancës euroatlantike.
Në deklaratë theksohet se marrëveshja pasqyron partneritetin strategjik mes Uashingtonit dhe Tiranës. SHBA po ashtu vlerëson kontributin e Shqipërisë si aleate e NATO-s dhe bashkëpunimin e vazhdueshëm në çështjet e sigurisë dhe politikës së jashtme.
Sakaq, pala amerikane vë në dukje rolin e Shqipërisë në mekanizmat ndërkombëtarë të sigurisë, përfshirë pjesëmarrjen si anëtare themeluese e Bordit të Paqes të Presidentit Donald Trump.
Marrëveshja prej 302 milionë dollarësh konsiderohet një investim i rëndësishëm në modernizimin e kapaciteteve ushtarake të Shqipërisë dhe një tjetër hap në forcimin e bashkëpunimit strategjik mes dy vendeve.
Discussion about this post