Ministria e Shëndetësisë ka bërë me dije se në Kosovë është konfirmuar prezenca e variantit Delta Plus të koronavirusit, ku deri në këto momente janë regjistruar 12 raste.Evidentimi i këtyre rasteve me Delta Plus ka ardhur pas testimit të 70 mostrave pozitive në një laborator në Gjermani. Sipas Ministrisë, 47 mostra e tjera janë identifikuar me variantin Delta.
Delta Plus është një mutacion i ri i koronavirusit dhe sipas ekspertëve ky variant përhapet më lehtë se variantet e tjera të virusit.
“Ekipet e Institutit Kombëtar të Shëndetësisë Publike po hulumtojnë dhe gjurmojnë pandërprerë të gjitha burimet e mundshme për të parandaluar përhapjen e mëtutjeshme të rasteve, detektimin e hershëm të rasteve dhe implikimet e mundshme në shëndetin e njeriut për variantin e ri Delta Plus”, është thënë në njoftim.
Që prej fundit të marsit të vitit 2021, kur ka filluar fushata e imunizimit kundër koronavirusit, në Kosovë janë vaksinuar 744,671 persona me të dyja dozat e vaksinës.
Ndërkohë, me një dozë janë të vaksinuar 842,794 persona.
Discussion about this post