Duke marrë parasysh abuzimet e shumta që po bëhen me tenderët në kohët e fundit, Agjencia e Prokurimit Publik ka miratuar udhëzuesin mbi deklarimin e konfliktit të interesit nga zyrtarë apo nëpunës në procesin e prokurimit dhe zbatimit të kontratës për punë, mallra apo shërbime. Përmes një njoftimi zyrtar, ky dikaster bën me dije se në hartimin e tij ka bashkëpunuar me Inspektoratin e Lartë të Deklarimit dhe Kontrollit të Pasurive dhe Konfliktit të Interesit, si institucioni kompetent për parandalimin e konfliktit të interesit në ushtrimin e funksioneve publike.
Sipas APP-së ky udhëzim ka si qëllim të parandalojë konfliktin e interesit në procedurat e prokurimit publik, në çdo situatë, ku titullari, punonjës të autoritetit kontraktor ose ofruesit e shërbimit të prokurimit, që veprojnë në emër të autoritetit kontraktor të përfshirë në zhvillimin e procedurës së prokurimit, mund të ndikojnë në rezultatin e kësaj procedure, duke cenuar paanësinë dhe pavërtetësinë e tyre në vendimmarrjen e procedurës së prokurimit.
Kjo nuk është hera e parë që APP nxjerr udhëzime në drejtim të hartimit dhe zhvillimit të procedurave tenderuese. Para disa javësh, ky dikaster njoftoi se kishte konstatuar një sërë shkeljesh në drejtim të hartimit të dokumenteve të tenderit nga ana e institucioneve shtetërore, duke rekomanduar një sërë hapash që duhet të ndiqen në mënyrë që të zbatohen dispozitat ligjore në fuqi.
Discussion about this post