Dy persona mbetën të plagosur si pasojë e një konflikti për një gurore në Borizanë të Krujës. Në konflikt u përfshinë anëtarë të fisit Rraja dhe anëtarë të fisit Maja. Nga raportimet, përfshi edhe njoftimin zyrtar të Policisë, dy persona të fisit Maja, njëri në gjendje të rëndë shëndetësore, janë dhunuar me sende të forta, përfshi edhe tytat e armëve.
Një nga personat e përfshirë në konflikt, sipas raportimeve është Xhelal Rraja, administratori i gurores. Ai është vëllai i deputetit socialist Rrahman Rraja, raporton BalkanWeb.
Shkak për përplasjen e dhunshme janë bërë guroret që operojnë në këtë zonë, për të cilat banorët janë ngritur disa herë në protestë.
Lidhur me ngjarjen ka reaguar edhe Policia. Sipas saj, katër persona kanë plagosur me sende të forta dy shtetas, njëri prej të cilëve është në gjendje të rëndë. Ngjarja ka ndodhur pranë një lokali. Ndërsa dy të dyshuar janë shoqëruar në polici.
“Ditën e sotme, në një lokal në aksin rrugor Fushë Krujë – Thumanë ka ndodhur një konflikt mes shtetasve B. M., e J. M., dhe shtetasve Xh. Rr., I. Rr., dhe K. Rr.
Gjatë konfliktit shtetasit Xh. Rr., I., Rr., dhe K. Rr., dyshohet se kanë goditur me sende të forta shtetasit B. M. dhe J. M., të cilët si pasojë janë dëmtuar dhe ndodhen në spital, nën kujdesin e mjekëve.
Shkak për konfliktin midis këtyre shtetasve dyshohet të jetë një gurore në fshatin Borizanë, në pronësi të shtetasit P. Rr., i cili ka leje shfrytëzimi dhe licensë për zhvillimim e aktivitetit dhe sipas pretendimeve të shtetasve të dëmtuar (B. M. dhe J. M.) kur ndodhin plasje në gurore, krijon shqetësime në banesat e tyre.
Shërbimet e Komisariatit të Policisë Krujë kanë shoqëruar shtetasit Xh. Rr., dhe P. Rr., si dhe po punojnë për shoqërimin e shtetasve I. Rr., dhe K. Rr., të përfshirë në këtë konflikt.
Discussion about this post