Trajneri italian Antonio Konte rikthehet sërish në qendër të vëmendjes së shtypit sportiv italian. Ish tekniku i Interit nuk startoi asnjë aventurë të re me ndonjë skuadër europiane por ditën e sotme është bërë publike detyra e re e 53 vjeçarit.
Tekniku në fjalë është zyrtarizuar nga rrjeti televiziv italian “Sky” si një nga opinionistët fiks të këtij sezoni.
Konte do të jetë në studiot televizive dhe jo në pankinë, duke folur për një objektiv që e ndjek prej vitesh e nuk e arrin, Ligën e Kampioneve. Ai do të jetë i ftuari special i “Sky” për Ligën e kampioneve në mesjavë, si dhe për ndeshjet e përfaqësueseve, ku sigurisht fokusi është te Italia të cilën ai e ka drejtuar disa vite më parë.
Vlen të theksohet se trajneri italian shpesh herë ka polemizuar me teknikët gjatë emicioneve të ndryshme ndërsa tashmë do të jetë ai në këtë pozicion. Për Konten u fol gjatë se mund të merrte drejtimin e skuadrës së Totenham por në fund palët nuk gjetën akordin.
